Կառավարության օգոստոսի 11-ի նիստի օրակարգում ներառված է Երեւանի ջերմաէլեկտրակենտրոն ՓԲԸ-ի կանոնադրական կապիտալն ավելացնելու մասին որոշման նախագիծը: Ըստ այս նախագծի, կառավարությունը նախատեսում է 10.7 միլիոն դրամի գազաբաշխիչ գազատարներ եւ այլ սարքավորումներ՝ 10.7 միլիոն դրամի, Երեւան ՋԷԿ-ի հաշվեկշռում ներառել:
Նախագծի նպատակը, ինչպես նշված է որոշման մեջ, «Երեւանի ջերմաէլեկտրակենտրոն» ՓԲԸ-ի կանոնադրական կապիտալի ավելացում եւ վերջինիս կողմից «Գազպրոմ Արմենիա» ՓԲԸ-ի հանդեպ կրեդիտորական պարտքի մարում:
Նախագծի հիմնավորման մեջ ասվում է, որ ՀՀ կառավարության տարբեր որոշումներով Հայաստանի համայնքների եւ կազմակերպությունների կողմից այդ գազաբաշխիչ գազատարները 2008-2013թթ ընթացքում նվիրատվության պայմանագրերով փոխանցվել են ՀՀ սեփականությանը` ի դեմս «Հայաստանի Հանրապետության էներգետիկայի եւ բնական պաշարների նախարարության աշխատակազմ» պետական կառավարչական հիմնարկի: Որոշումներով նախատեսվել էր գույքը ներդնել «Գազպրոմ Արմենիա» ՓԲԸ-ի կանոնադրական կապիտալում` համապատասխան չափով ավելացնելով Հայաստանի Հանրապետության 20% կազմող բաժնեմասը:
2014-ին ընկերության կանոնադրական կապիտալի ՀՀ բաժնեմասը ամբողջությամբ օտարվեց «Գազպրոմ» -ին: Որոշումներով նախատեսված գործընթացները չիրականացվեցին, գույքը մնաց ամրակցված «Հայաստանի Հանրապետության էներգետիկայի և բնական պաշարների նախարարության աշխատակազմ» պետական կառավարչական հիմնարկին եւ անհատույց օգտագործման պայմանագրերով տնօրինվում է «Գազպրոմ Արմենիա» ՓԲԸ-ի կողմից: 2004- ին էներգետիկայի բնագավառում տեխնիկական օգնության եւ դրամաշնորհների ծրագրերով ստացված գույքը նախատեսվել էր ներդնել «Գազպրոմ Արմենիա» ՓԲԸ-ի կանոնադրական կապիտալում: Այդ գործընթացը նույնպես չի իրականացվել եւ այդ գույքը մինչ այժմ անհատույց տնօրինվում է «Գազպրոմ Արմենիա» ՓԲԸ-ի կողմից:
Կարդացեք նաև
Եւ կառավարության վաղվա նիստում որոշում կկայացվի այդ գազաբաշխիչ գազատարները ներդնել Երեւան ՋԷԿ-ի կանոնադրական կապիտալում` վերջինիս կողմից համապատասխան քանակությամբ հասարակ (սովորական) բաժնետոմսերի թողարկման եւ Հայաստանի Հանրապետության օգտին տեղաբաշխման եղանակով: Ապա` Երևանի ՋԷԿ-ն էլ իրեն սեփականությանն անցած գույքը կօտարի «Գազպրոմ Արմենիա» ՓԲԸ-ին եւ ստացված միջոցներով կմարի վերջինիս հանդեպ իր կրեդիտորական պարտքից:
Նելլի ԲԱԲԱՅԱՆ
