Ըստ քաղաքագետ Մանվել Սարգսյանի, Ադրբեջանի ու Ռուսաստանի համատեղ հայտարարությունը տակտիկական հրթիռների արտադրության մասին ՌԴ կողմից Ադրբեջանին սիրաշահելու հերթական քայլ է: «Խոսքը վերաբերում է ինքնաթիռներին»,- համատեղ հրթիռների արտադրության լուրն ավելի որոշակիացրեց քաղաքագետը:
Ըստ նրա, ՌԴ-ն փորձում է համատեղ արտադրությամբ հանգստացնել Ադրբեջանին. «Սա կարող է այս վիճակից օգտվելու, Ադրբեջանին հանգստացնելու առաջարկ լինել, որովհետեւ իսկանդերների ցուցադրությունից հետո տարբեր զրույցներ սկսվեցին՝ ինչու Ռուսաստանը տրամադրեց, այսինքն` ՌԴ-ի կողմից փորձ է արվում Ադրբեջանին իր ծրագրերի մեջ ներգրավել: Բայց այդ փորձը պետք է դիտարկել ՌԴ քաղաքականության համատեքստում, երբ մի կողմից ՌԴ-ն Ադրբեջանին է զենք տրամադրում, հետո Հայաստանին է զենք վաճառում՝ այսպես վարում իր քաղաքականությունը»:
Պարոն Սարգսյանը անդրադարձավ նաեւ ադրբեջանական կողմի հայտարարությանը, թե «Երկաթե գմբեթ» են պատրաստվում ձեռք բերել, որով կարող են որսալ նաեւ «Իսկանդեր»:
«Իսկանդերը որսալու խնդիր չկա: Իրենց մեջլիսի մի պատգամավոր է նման հայտարարություն արել, որ Իսրայելի հետ պայմանավորվում են հակահրթիռային սարք ձեռքբերել՝ հայտնի «երկաթե գմբեթը»: Բայց դա կամ հենց այնպես հայտարարություն էր կամ էլ այդ մարդն անտեղյակ էր, որովհետեւ «երկաթե գմբեթը» նման հրթիռների համար չէ: Այն ավելի ցածր ու մոտ թռչող հրթիռների համար նախատեսված սարք է»,- Aravot.am-ին ասաց պարոն Սարգսյանը:
Կարդացեք նաև
Հիշեցնենք, որ ադրբեջանցի պատգամավոր Եվդա Աբրամովն էր «Երկաթե գմբեթի» մասին «սենսացիոն» հայտարարությունն արել։
Արփինե ՍԻՄՈՆՅԱՆ
