«Սեքյուրիթի Դրիմ» ընկերության, որը հայտնի է, որպես արագաչափերը տնօրինող ընկերություն, լիազորությունները կանցնեն պետական կառավարմանը: Այսօր կառավարության նիստում այս մասին հայտարարեց վարչապետ Կարեն Կարապետյանը:
Վարչապետը ՀՀ ոստիկանապետին, Արդարադատության եւ ֆինանսների նախարարներին ու Երեւանի քաղաքապետին հանձնարարեց քննարկել գործընթացը կազմակերպելու հարցը: Կարեն Կարապետյանի խոսքերով, այս հանձնարարականները բխում են հանրապետության նախագահի երեկվա խորհրդակցության ժամանակ տված հանձնարարականներից:
Հիշեցնենք, որ երեկ Սերժ Սարգսյանը հանձնարարել էր «Սեքյուրիթի Դրիմ», «կարմիր գծերի» սեփականատեր «Փարքինգ Սիթի Սերվիզին» եւ «Լոկատոր» ՓԲԸ կոնսորցիումի հետ բանակցություններ վարել եւ տասնօրյա ժամկետում մշակել իրավական մեխանիզմներ, որպեսզի սեփականության ձեւով պայմանավորված նրանց գործառույթները անցնեն պետական եւ համայնքային կառույցներին:
Վարչապետը ոստիկանապետին նաեւ հանձնարարեց մինչեւ նոյեմբերի 30-ը ներկայացնել ճանապարհային ոստիկանության համակարգի բարեփոխումների հայեցակարգ:
Լուսինե ԲՈՒԴԱՂՅԱՆ
