Տավուշի մարզի Բերդ քաղաքի բնակիչ, 1952թ. ծնված Վաչիկ Ծատուրյանին մեղադրանք է առաջադրվել այն բանի համար, որ նա 2016թ. մայիսի 20-ից 25-ն ընկած ժամանակահատվածում ուրիշի գույքի գաղտնի հափշտակություն կատարելու նպատակով ապօրինի մուտք է գործել Հովիկ Աթոյանին պատկանող հողամաս եւ այնտեղից հափշտակել 1 մետր 20 սմ բարձրությամբ արծաթափայլ եղեւնի, Հ.Աթոյանին պատճառելով 33 հազար դրամի նյութական վնաս:
Վ. Ծատուրյանին մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ կետով («Գողությունը՝ ուրիշի գույքի գաղտնի հափշտակությունը, որը կատարվել է պահեստարան կամ շինություն ապօրինի մուտք գործելով»): Նրա նկատմամբ խափանման միջոց է ընտրվել չհեռանալու մասին ստորագրությունը:
Տավուշի մարզի առաջին ատյանի դատարանի Բերդի նստավայրում դատաքննությամբ դատարանը հաստատված է համարել այն հանգամանքը, որ Վ. Ծատուրյանը 2016թ. մայիսի 20-ից 25-ն ընկած ժամանակահատվածում հանդիպելով Հովիկ Աթոյանի զոքանչին, իմանալով, որ նրա տանը կից այգում Հ. Աթոյանն աճեցնում է արծաթափայլ եղեւնիներ, խնդրել է դրանից մեկը տալ իրեն: Աթոյանի զոքանչը սկզբում չի համաձայնել, սակայն հետագայում ստանալով նրա թույլտվությունը՝ Վ. Ծատուրյանը տնկիներից մեկը հանել է եւ տեղափոխել իր այգի:
Հետո, երբ Հ. Աթոյանը դիմել է իրավապահ մարմիններին, Ծատուրյանը վերադարձրել է եղեւնին, տնկել նույն տեղում, այդ մասին հայտնել է Աթոյանի զոքանչին, խնդրելով այն ջրել: Դատաքննության ընթացքում նա նաեւ վճարել է եղեւնու արժեքը:
Կարդացեք նաև
Ըստ «Դատալեքս» դատական տեղեկատվական համակարգի՝ դատաքննությամբ ձեռք բերված բավարար ապացույցների հիման վրա հերքվել է հանցագործության դեպքը, որի պատճառով մեղադրողը հրաժարվել է մեղադրանքից՝ միջնորդելով կարճել քրեական գործի վարույթը: Նոյեմբերի 8-ին դատավոր Զոյա Զաքինյանը վճռել է առաջադրված մեղադրանքում Վաչիկ Ծատուրյանին արդարացնել. նրա նկատմամբ ընտրված խափանման միջոցը վերացնել, իրեղեն ապացույց ճանաչված եղեւնին թողնել Հովիկ Աթոյանի տնօրինմանը:
Ոսկան ՍԱՐԳՍՅԱՆ
