Այսօր հրավիրված մամուլի ասուլիսում անդրադառնալով դոպինգի պատճառով իր անվան շուրջ մամուլում եւ սոցիալական ցանցերում հրապարակումներին՝ Հռիփսիմե Խուրշուդյանն ասաց. «Ցավ եմ ապրում, որ մեր հարգելի լրագրողները վատ լուրն են շուտ տարածում: Որոշ հրապարակումներում, ասես, պակասում է միայն «վերջապես որակազրկվեց» արտահայտությունը: Այդպես պետք չէ: Չէ՞ որ մարզիկները ձեր ոգեւորելու կարիքն ունեն: Ինչո՞ւ չի ասվում նաեւ, որ Հռիփսիմե Խուրշուդյանը ներկայումս Եվրոպայի գործող չեմպիոնն է ու նրան պետք է հատկապես հիմա ոգեւորել:
Երեկ կարդում եմ մեկի գրածը. «Շտապ: Վատ լուր: Ծանրամարտիկ Հռիփսիմե Խուրշուդյանի հետ ամբողջ ազգը ծանր է տանում»: Մտածեցի, թե մահացել եմ: Լուրջ եմ ասում»:
Հարցին, թե Լոնդոնի օլիմպիական մեդալը վերադարձնելո՞ւ է, Հռիփսիմեն պատասխանեց. «Եթե ինձ մնար, հաստատ չէի վերադարձնի: Բայց քանի որ գոյություն ունի օրենք, պետք է հետեւենք օրենքին»:
Աշոտ ՀԱԿՈԲՅԱՆ
