«Սասնա ծռեր» խմբի անդամ Տիգրան Սարգսյանի կալանքը որպես խափանման միջոց Արաբկիր Քանաքեռ-Զեյթուն վարչական շրջանների ընդհանուր իրավասության դատարանի որոշմամբ այսօր եւս երկու ամսով երկարաձգվեց:
Սարգսյանի պաշտպան՝ փաստաբան Գրիշա Բալասանյանը Aravot.am-ին ասաց, որ կալանքի երկարաձգման վերաբերյալ քննիչի՝ դատարան բերած հիմնավորումները վերաբերելի չէին իր պաշտպանյալի գործին. «Դատարանների համար դարձել է մեխանիկական աշխատանք, առանց փաստաթղթերի, ապացույցների խորքային հետազոտման որոշումներ կայացնելը: Դատարանում հիմնավորեցինք, որ քննիչի միջնորդության կից որեւէ ապացույց վերաբերելի չէ Տիգրան Սարգսյանին, չկար ուղղակի ապացույց, որ Տիգրան Սարգսյանը պատանդ էր պահել, զենք-զինամթերք է ունեցել եւ այլն: Ընդհակառակը, տուժողները՝ այդ թվում բարձրաստիճան ոստիկաններից պնդում էին, որ Տիգրան Սարգսյանը ակտիվ գործողություններ չի կատարել: Բժիշկները, որոնք պնդում են, որ պատանդի կարգավիճակում են պահվել, Տիգրան Սարգսյանի անունն ընդհանրապես չեն նշել, բայց քանի որ մեր դատարանները մեխանիկական աշխատանք են կատարում, այլ բան չկար, քան քննիչի միջնորդությունը բավարարելը»:
Հիշեցնենք, որ Տիգրան Սարգսյանին մեղադրանք է առաջադրվել ՀՀ քրեական օրենսգրքի 235 հոդվածի 3-րդ մասով և 218 հոդվածի 3-րդ մասի 1-ին կետով, այն բանի համար, որ նա կազմակերպված խմբի կազմում ապօրինի կերպով ձեռք է բերել, պահել, փոխադրել և կրել է հրազեն ու ռազմամթերք: Ինչպես նաև 2016թ. հուլիսի 27-ից 31-ն ընկած ժամանակահատվածում ՀՀ ոստիկանության Երևան քաղաքի վարչության ՊՊԾ գնդի վարչական շենքում և հարակից տարածքում կազմակերպված խմբի կազմում զենքի գործադրմամբ պատանդ է վերցրել և պահել «Շտապբուժօգնություն» ՓԲԸ անձնակազմի երեք աշխատակիցների՝ նրանց ազատելու պայմանով պետական մարմիններին ներկայացնելով վիրաբուժական նոր անձնակազմով ապահովելու, ինչպես նաև ՀՀ առողջապահության նախարարի կողմից գնդի տարածք ժամանելու պահանջներ:
Արփինե ՍԻՄՈՆՅԱՆ
փաստաբանէ աւելի, հոգեբուժի կարիքը ունեն այս մարդիկը