«ԻԻՀ նախագահի այցը Հայաստան ունի չափազանց կարևոր նշանակություն՝ երկկողմ հարաբերությունների զարգացման համար»,-Aravot.am-ի հետ զրույցում անդրադառնալով Իրանի նախագահ Հասան Ռոհանիի հայաստանյան այցին՝ ասաց իրանագետ Արտյոմ Տոնոյանը:
Նրա բնորոշմամբ՝ եթե մինչև այժմ ՀՀ-ԻԻՀ հարաբերություններում շեշտադրվել էին հիմնականում տնտեսական գործոնը և որպես պատմական հարևաններ բարիդրացիական հարաբերությունները պահպանելը, ապա այժմ իրավիճակն այլ է. «Դատելով տարածաշրջանում ստեղծված իրավիճակից, երբ մի կողմից Ադրբեջան է այցելում ԻԻՀ ոխերիմ թշնամի Իսրայելի վարչապետը և ձեռք բերում նոր ռազմական և անվտանգությանն առնչվող պայմանավորվածություններ Ադրբեջանի նախագահ Իլհամ Ալիևի հետ, իսկ մյուս կողմից՝ խորը ճգնաժամային փուլ են ապրում ԻԻՀ-Թուրքիա հարաբերությունները, իսկ երկու երկրներում միմյանց դեսպանատների և հյուպատոսարանների առջև հանրային ցույցեր են կազմակերպվում, Հայաստանի հետ բացարձակ նոր որակի հարաբերությունների կառուցումը Իրանի համար պարունակում է կենսական նշանակության տարրեր»:
Արտյոմ Տոնոյանի դիտարկմամբ՝ Ռոհանիի այցով Հայաստան-Իրան հարաբերություններում նոր հեռանկարներ են բացվելու, և առաջին հերթին խոսքը վերաբերում է անվտանգության ոլորտում գործակցությունների նոր ծրագրի մշակմանը. «Դա ի զորու կլինի ապահովել և ԻԻՀ-ի, և ՀՀ-ի տարածաշրջանային անվտանգությանը վերաբերող շահերը: Թվում է՝ Իրանի հետ ռազմավարական դաշինքի ձևավորումը ամենևին էլ սարի հետևում չէ»:
Լուիզա ՍՈՒՔԻԱՍՅԱՆ
