«Ադրբեջանը սոցիալ-տնտեսական բարդ փուլ է մտնում: Նավթի գների նվազմանը զուգահեռ կպահպանվի ռազմատենչ հռետորիկան»,-«Բլից ինֆո» մամուլի ակումբում այսօր անդրադառնալով Իլհամ Ալիեւի վերջին հայտարարությանը, ասաց քաղաքագետ Սերգեյ Մինասյանը: Հիշեցնենք՝ երեկ Ադրբեջանի նախագահը հերթական անգամ իր քաղաքացիներին հրամցրել է «ապրիլյան դեպքերի առասպելը», համաձայն որի՝ Ադրբեջանն իբր հազարավոր հեկտարներ է գրավել: «Արժանի պատասխան կտանք ցանկացած սադրանքի: Հայաստանը նույնիսկ մեկ շաբաթ մեր առջեւ դիմանալ չի կարող»,-ասել է Իլհամ Ալիեւը:
«Ապրիլից հետո Ադրբեջանն իրեն զուսպ է պահում ռազմաճակատում՝ Չինարիի դեպքի բացառությամբ: Դա նշանակում է՝ կամ ապրիլյան դեպքերից հետո լուրջ հետեւություններ է արել, կամ նախապատրաստվում է նոր գործողությունների, որոնց մակարդակը գուցե որոշակիորեն համեմատվի ապրիլյան դեպքերի հետ: Հնարավոր են կրկին բախումներ, բայց կարծում եմ՝ ադրբեջանական կողմն ինչպես ապրիլին ի վիճակի չեղավ գնալ լայնածավալ պատերազմի, այնպես էլ առաջիկայում չի գնա նմանօրինակ էսկալացիայի: Դա չի նշանակում, որ սահմանային դեպքերը բացառված են»,-կարծիք հայտնեց քաղաքագետը:
Անդրադառնալով ՀՀ ներքաղաքական կյանքին՝ Սերգեյ Մինասյանը նշեց, որ հաջորդ շաբաթում կտեսնենք նոր հայտարարություններ. քաղաքական ուժերը կմտնեն նախընտրական պայքարի վերջնական փուլ. «Հնարավոր են հետընտրական գործընթացներ, բայց չեմ կարծում, որ դրանք համեմատելի կլինեն 2007-08թթ. զարգացումների հետ»:
Կարդացեք նաև
Լուիզա ՍՈՒՔԻԱՍՅԱՆ
