Այսօր, ինչպես հայտնել ենք, Կենտրոն եւ Նորք -Մարաշ համայնքների ընդհանուր իրավասության դատարանում ԱԱԾ-ի կողմից հայտնաբերված «Նորք Մարաշի զինված խմբի» գործով դատական նիստն էր, որը չկայացավ, քանի որ Վահան Շիրխանյանը դատական նիստին չէր ներկայացել:
Նիստից հետո լրագրողների հետ զրույցում զինված խմբի ղեկավար Արթուր Վարդանյանի պաշտպան Լեւոն Բաղդասարյանն ասաց, որ արհեստածին ձեւով նիստերը հետաձգվում են. «Չմոռանանք, որ իմ պաշտպանյալի խափանման միջոցը կալանքն է, նա 1 տարուց ավելի գտնվում է անազատության մեջ, բնականաբար, նա ցանկություն ունի, որպեսզի օբյեկտիվ ձեւով դատապրոցես լինի եւ արդարադատություն իրականացվի»:
Նա ասաց, որ Արթուր Վարդանյանը չի ընդունում մեղադրանքը. «Համարում է հնարածին, շինծու: Նա չի կատարել այնպիսի արարք, որը վերջինիս մեղսագրված է»:
Հաշվի առնելով, որ նիստի ավարտից հետո խմբի անդամ Խաչիկ Ավետիսյանը հայտարարեց, որ կեղծ ցուցմունք տված անձինք դրսում են, իսկ իրենց տանում-բերում են, լրագրողները հարցրեցին փաստաբանին՝ Արթուր Վարդանյանի դեմ ցուցմունք տված անձինք կա՞ն խմբի անդամներից: Նա դժվարացավ պատասխանել՝ ասելով, որ այդ բոլոր հարցերի պատասխանները կստանանք դատաքննության ընթացքում:
Կարդացեք նաև
Հռիփսիմե ՋԵԲԵՋՅԱՆ
