Այսօր Կենտրոն եւ Նորք -Մարաշ համայնքների ընդհանուր իրավասության դատարանում ԱԱԾ-ի կողմից հայտնաբերված «Նորք -Մարաշի զինված խմբի» գործով դատական նիստը հետաձգվեց, քանի որ գործով մեղադրյալ Վահան Շիրխանյանը չէր եկել դատական նիստին: Ինչպես տեղեկացրել ենք, դատավորն ասաց, որ քրեակատարողականից տեղեկացրել են, թե Վահան Շիրխանյանը հրաժարվել է մասնակցել դատական նիստին ու հրաժարվել է առհասարակ դուրս գալ խցից, թեեւ իր առողջական վիճակը բավարար է, կարող է գալ: Մինչդեռ Հայկ Ալումյանը վստահեցրեց, որ Վահան Շիրխանյանը անկողնային է, նա առանց պատգարակի ի վիճակի չէ գալ, նրան պետք է բերեն:
Փաստաբանները մեկը մյուսի հետեւից սկսեցին հորդորել դատավորին, որ արհեստականորեն չերկարաձգեն ու չձախողեն նիստերը եւ իրենց իրավունքները չխախտեն:
Գործով մեղադրյալ Գառնիկ Մարգարյանի փաստաբան Հովիկ Արսենյանի խոսքերով՝ ընդունենք, այս նիստը հետաձգվեց եւ հաջորդ նիստը մեկ շաբաթ անց եղավ, նորից նույն իրավիճակն է լինելու. «Դուք հավատում եք բժշկին, որ գրել է, թե բավարար է առողջությունը, բայց Շիրխանյանն էլ հայտարարել է, որ ինչպիսի առողջական խնդիրներ ունի: Այս պայմաններում դա բավարար է, որ դատարանի կողմից նշանակվի հանձնաժողովային դատաբժշկական փորձաքննություն: Մեկ-երկու շաբաթ հետո, մեկ է, դատարանը այս որոշման գալու է, չձգձգվի»:
Նա սկսեց ձայնը բարձրացնել, երբ դատավորն ասաց, որ բժիշկը այլ բան է ասում: Հովիկ Արսենյանի խոսքերով՝ մարդն էլ ասում է՝ չեմ կարող գալ, բա ե՞րբ պետք է լինի փորձաքննությունը, ավելի լավ է շուտ այդ որոշումը կայացնեն: Դատավորը հորդորեց Հովիկ Արսենյանին չխանգարել նիստը: Նա էլ արձագանքեց. «Հիմա էլ խանգարող դառա՞»:
Կարդացեք նաև
Պաշտպաններից մեկը առաջարկեց, որ Վահան Շիրխանյանի մասը գործից անջատել, որ այս գործով նիստերը կայանան:
Դատավորը չընդունեց: Նա ասաց, որ հաջորդ դատական նիստը նշանակվում է հունվարի 20-ին, ժամը 14.30-ին:
Ուշագրավ է, որ նիստի ավարտին զինված խմբի անդամ Խաչիկ Ավետիսյանը բորբոքվեց եւ մատը թափահարելով ասաց. «Կեղծ ցուցմունքները տվել են, իրանք դուրսն են, մեզ տանում-բերում են, տանում-բերում են»: Նա ասաց, որ հաջորդ նիստին չի գա:
Հռիփսիմե ՋԵԲԵՋՅԱՆ
