Մոմե քանդակագործության արվեստին տիրապետող Մարիա Տյուսոյի թանգարանը հիմնադրվել է 1835-ին` Լոնդոնի Մերիլեբոն թաղամասում: Մադամ Տյուսոյի թանգարանն այժմ 19 մասնաճյուղեր ունի աշխարհի տարբեր երկրներում, դրանք զբոսաշրջիկների ամենասիրելի վայրերից են: Ինչ վերաբերում է Ամստերդամում գտնվող մոմե արձանների թանգարանին, այն բացվել է 1971-ին, իսկ 20 տարի անց տեղափոխվել է քաղաքի կենտրոնական հրապարակներից մեկը` Դամ:
Թանգարանի մուտքի մոտ մշտապես երկար հերթեր են, մեր այցելության պահին` նույնպես: Այստեղ կարելի է հանդիպել քաղաքական գործիչների, շոու-բիզնեսի աստղերի, հանրահայտ ֆուտբոլիստների ու արվեստագետների, այդ թվում` արքայադուստր Դիանայի, Բարաք Օբամայի, Ջոնի Դեպի, Անջելինա Ջոլիի, Մերիլին Մոնրոյի, Ադելի, Սալվադոր Դալիի, Վան Գոգի, Պիկասոյի ու մյուսների մոմե արձանիկներին: Որոշների հետ լուսանկարվելու համար էլ ստիպված ես սպասել, խոսքը վերաբերում է հատկապես փոփ եւ ֆոտբոլային աստղերին:
Կարդացեք նաև
Թանգարանը նաեւ ինքնատիպ ու զվարճալի հուշանվերներ գնելու հնարավորություն է ընձեռում, օրինակ՝ Օսկարների վրա անմիջապես փորագրվում է գնորդի անունը: Մադամ Տյուսոյի թանգարանից հեռանալիս մտածում ես եւս մեկ անգամ վերադառնալու մասին: Տպավորիչ են մոմե արձանները՝ ձայնալուսային էֆեկտների մատուցմամբ: Հաճելի է, որ Ամստերդամում նույնքան մեծ հերթեր կային նաեւ այլ թանգարաններում, օրինակ՝ Վան Գոգի, ընդ որում, շատերի պարագայում մինչեւ 18 տարեկանների մուտքն անվճար էր:
ԳՈՀԱՐ ՀԱԿՈԲՅԱՆ
Ամստերդամ-Երեւան
Լուսանկարները` հեղինակի:
«Առավոտ»
17.01.2017
