Վարչապետ Կարեն Կարապետյանն այսօր կառավարության նիստին ասաց, որ մտածում են դիվանագիտական կորպուսում մեծացնել տնտեսական բաղադրիչը:
Կարեն Կարապետյանն արտաքին գործերի, տնտեսական զարգացման եւ ներդրումների նախարարություններին հանձնարարեց մեկ շաբաթյա ժամկետում ձեւավորել համատեղ աշխատանքային խումբ, ներկայացնել հստակ առաջարկություն Հայաստանի դեսպանների կողմից իրականացվելիք տնտեսական ոլորտի աշխատանքների թիրախների եւ հայտանիշների սահմանման ուղղությամբ՝ հաշվի առնելով տվյալ երկրների տնտեսական հետաքրքրություններն ու ներուժը:
«Սփյուռքի ներուժն է’լ առավել արդյունավետ ներգրավել այս գործում»`հանձնարարեց վարչապետը, իսկ դրա համար անհրաժեշտ է ակտիվացնել նախարարությունների եւ գերատեսչությունների համատեղ աշխատանքը:
Կարդացեք նաև
Սփյուռքի նախարարին էլ կառավարության ղեկավարը հանձնարարեց գործադիր մարմինների ղեկավարների հետ համատեղ մեկ ամսում ծրագիր մշակել՝ սփյուռքի հայտնի մասնագետների, կառավարիչների եւ նրանց կազմակերպությունների հետ երկկողմանի համագործակցությունը խորացնելու համար:
Վարչապետի խոսքերով՝ «Ոլորտները շատ են, թե առողջապահության, թե բիզնեսի, թե մշակույթի ոլորտները պետք է ներգրավել»:
Ըստ հանձնարարականի, տնտեսական զարգացման եւ ներդրումների նախարարությունը մեկ շաբաթում պետք է սփյուռքի նախարարության միջոցով սփյուռքի հայազգի գործարարներին փոխանցի ներդրումային ծրագրերը:
Նելլի ԲԱԲԱՅԱՆ
