«Բնականոն աշխատանքի մեջ է եղել: Գուցէ ծանրաբեռնված շրջան է իր համար»,- Aravot.am-ի հետ զրույցում ասաց ՕԵԿ խմբակցության ղեկավար Հեղինե Բիշարյանն`անդրադառնալով «Հայկական վերածնունդի» երիտթեւի ղեկավարի`կուսակցությունը լքելու փաստին: Տիկին Բիշարյանն ասում է, որ որեւէ խնդիր չի տեսնում, որ Դավիթ Հարությունյանը լքել է ուսակցությունը: Ի դեպ, նա հավելեց, որ ՀՎԿ-ն երիտթեւի երկու ղեկավար ունի`մեկը քաղաքի պատասխանատուն է, մյուսը`մարզի:
«Ինքը ռեյտինգային ցուցակում կար, կուսակցական աշխատանքում իր մասնակցությունը շատ ակտիվ էր, այնպես որ… գուցեեւ ինչ-որ մի անձնական խնդիր է ունեցել: Չգիտեմ»,- ասաց մեր զրուցակիցը: Ճշտող հարցին ի պատասխան`արտառոց ոչինչ չի՞ տեսնում Դավիթ Հարությունյանի քայլում, ասաց. «Ոչ»:
Նկատեցինք, որ կուսակցությունը լքելու պատճառների մասին Դավիթ Հարությունյանն ասել է, որ կուսակցությունում գաղջ մթնոլորտ է, որ Արթուր Բաղդասարյանի ասած որեւէ խոսքը գործ այդպես էլ չդարձավ, որ ՀՎԿ-ում խաբում են ընտրողներին: Հեղինե Բիշարյանը հակադարձեց. «Ինչպե՞ս կարող է այդպիսի բան լինել: Ինքը ճիշտ չի ասել: Ինքը կառավարման խորհրդի անդամ է, բոլոր որոշումներին մասնակցել է: Երիտմիության թեւում ինքն ավելի շատ ինքնուրույն էր աշխատում, բոլոր հնարավորություններն իրեն տրված էին: Սա ինչ-որ նախընտրական քայլ է իր կողմից, եւ կարծում եմ, պատճառաբանությունները երկրոդական են»:
Նելլի ԳՐԻԳՈՐՅԱՆ
Կարդացեք նաև
