Մարտի 26-ին Վանաձորի Հովհաննես Աբելյանի անվան պետական դրամատիկական թատրոնում վանաձորցիների հետ նախընտրական հանդիպման ժամանակ ՀՀ Տարածքային կառավարման եւ զարգացման նախարար, ՀՅԴ կուսակցության անդամ Դավիթ Լոքյանն ասաց, որ իրենց կուսակցության համար թիվ մեկ խնդիրը երկրի տնտեսության զարգացումն է:
«Դաշնակցությունը քաղաքական կուսակցություն է, որը մշտապես իր հայտարարությունների, սկզբունքային հարցերի ու խնդիրների տերն է եղել: Մենք որդեգրել ենք մի սկզբունք: Եթե մենք 2 տարվա ընթացքում տնտեսական բարեփոխումները չենք ամբողջացնելու երկրում, չենք դնելու այնպիսի վիճակի մեջ, որ մեր քաղաքացին տեսնի, որ լույս է վառվում հեռվում, որին ինքը կհասնի մի քանի տարի հետո, Դաշնակցությունը չի մնալու կառավարությունում: Դաշնակցության համար ինքնանպատակ չի կառավարությունում մի քանի պաշտոնյա ունենալը»:
Ըստ նախարարի, այսօր ՀՀ քաղաքացին լուրջ չի վերաբերվում ընտրություններին. «Մեր քաղաքացիները, մեր բնակիչները, որպես կանոն, միշտ ընտրությունների են գնում ծանոթի ու պաշտոնյայի ասելով։ Եվ ընտրության հաջորդ օրվանից նորից սկսում են անիծել իրենց բախտը, իրենց երկիրը, իրենց պաշտոնյային եւ իրենք իրենց: Դրա պատճառն այն է, որ մենք ինքներս չենք հասկանում, թե ինչքան կարեւոր է, որ ազգային ժողով ուղարկենք լավագույններին»:
Կարդացեք նաև
Դաշնակցություն խմբակցության քարտուղար Աղվան Վարդանյանը հայտարարեց, որ ընտրություններից հետո իշխող Հանրապետականը Լոռու մարզից ազգային ժողովում ներկայացված է լինելու առավելագույնը 3 պատգամավորով. «Ով որ հասկանում է մեխանիզմները, թվերը եւ այլն, գիտի: Բա դուք չե՞ք ուզում, որ ձեր մարզից Դաշնակցությունը ունենա մի ռեյտինգային թեկնածու: Հերիք չի իրար վերաբերվենք՝ անվստահությամբ, չարությամբ, ատելությամբ, նախանձով: Հասկանում եմ, որ ազդեցություններ կան, հարաբերություններ, կապեր, խոստումներ ու պարտավորություններ կան, բայց մի գնացեք էն բանի հետեւից, որ վաղը ձեզ համար ավելի վատ ա լինելու»:
Տաթեւիկ ՂԱԶԱՐՅԱՆ
