Հունիսի 9-ին Կոմիտասի թանգարան- ինստիտուտում բացվեց «Ստեղծարար Հայաստան» ֆորումը:
Բրիտանական խորհրդի հայաստանյան գրասենյակի ղեկավար Արեւիկ Սարիբեկյանը նշեց, որ «Ստեղծարար Հայաստան» ֆորումի նպատակն է քննել ստեղծարար ոլորտում խնդիրները եւ քննարկել, թե ինչ է անհրաժեշտ առաջընթացի համար:
ԵՄ Արևելյան գործընկերության «Մշակույթ և ստեղծարարություն» ծրագրի ազգային համակարգող Նորայր Երզնկյանը նշեց, որ ծրագիրն իրականացվում է 2015-ից` 6 երկրում` Հայաստանում, Ուկրաինայում, Վրաստանում, Բելառուսում, Մոլդովայում և Ադրբեջանում: Թեև ծրագիրը տարածաշրջանային է, սակայն յուրաքանչյուր երկրում այն իրականացվում է` հաշվի առնելով տեղական առանձնահատկությունները:
Նորայր Երզնկյանը հավելեց, որ ծրագրի սկսվելու առաջին օրվանից վերջինիս կայքն ունեցել է 400 000 այցելություն: Նրա ձեւակերպմամբ, ծրագրի նվաճումներից են առցանց դասընթացները, ընդ որում 11000 մարդ արդեն մասնակցել է այդ դասընթացներին եւ ստացել վկայականներ:
Ծրագրի շրջանակում արվել է նաեւ երեք հետազոտություն, իսկ 12 մասնակիցներ առաջիկայում մասնակցելու են Մոլդովայում կայանալիք աշխատաժողովին:
ԵՄ Արևելյան գործընկերության «Մշակույթ և ստեղծարարություն» ծրագրի թիմի ղեկավար Թիմ Ուիլյամսը նշեց, որ ապրում ենք մի ժամանակաշրջանում, երբ մեխանիզիացիան ազդում է բոլոր ոլորտների վրա, իսկ Օքսֆորդի համալսարանի հետազոտություններն էլ փաստում են, որ մինչեւ 2035 թ աշխատանքների մեծ մասը մեքենաներն են անելու: Հետեւաբար, պարոն Ուիլյամսի խոսքով, ապագան պահանջում է նորարարություն:
«Անհրաժեշտ են ստեղծարար մարդիկ, մշակույթն էլ պետք է ինտեգրել ժամանակակից տնտեսության մեջ: Տնտեսության բոլոր ոլորտներին անհրաժեշտ են ստեղծարար մարդիկ: Հայաստանը նման մարդիկ ու տաղանդներ շատ ունի»,- հայտնեց Թիմ Ուիլյամսը:
ՀՀ տնտեսական զարգացման եւ ներդրումների նախարարի տեղակալ Էմիլ Տարասյանը փաստեց, որ գլոբալ տնտեսական աճը 5 %-ից նվազել է 2-2,5 %-ով, նաեւ արտադրողականության անկում է գրանցվել: Նրա համոզմամբ, Հայաստանի տնտեսության հիմքում եւս պետք է լինի ստեղծարար ներուժը, մանավանդ նման հնարավորություն շատ ունենք: Փոխնախարարը փաստեց, որ պետական հատվածն այսօր ամենաքիչն է ասոցացվում ստեղծարարության հետ, մինչդեռ նրա ձեւակերպմամբ, հարկավոր է, որ երազանքի հետեւից գնացող մարդն իրեն լավ զգա:
ԵՄ Արևելյան գործընկերության «Մշակույթ և ստեղծարարություն» ծրագրի Արեւելյան Գործընկերության տարածաշրջանում ստեղծարար արդյունաբերության զարգացման զեկույցի հեղինակ Քրիստինա Ֆարինհան էլ (Պորտուգալիա) ներկայացրեց Հայաստանում ստեղծարար արդյունաբերության վերաբերյալ կատարած ուսումնասիրության հիմնական արդյունքները եւ առաջարկությունները:
«Ստեղծարար Հայաստան» ֆորումը կշարունակվի հունիսի 10-ին եւ 11-ին:
Գոհար ՀԱԿՈԲՅԱՆ
