Եթե ձեզ մոտ հյուր են գալու ձեր ընկերները՝ մի գավաթ գինի խմելու համար, բացի պանրից, ձիթապտղից եւ երշիկներից, կարող եք նրանց առաջարկել նաեւ արագ պատրաստվող եւ շատ համեղ այս կարկանդակները: Վստահեցնում եմ, որ ձեր հյուրերը գոհ կմնան:
Անհրաժեշտ մթերքները
Պատրաստի շերտավոր խմոր- 400 գրամ
Պանիր (ցանկալի է՝ ֆետա կամ բրինզա տեսակի)- 100 գրամ
«Պեստո» թանձրուկ- 100 գրամ
Տանձ- 1 հատ
Ընկույզ կամ պիստակ- 100 գրամ
Հավկիթ- մեկ հատ
Խաղող-զարդարելու համար
Պատրաստման եղանակը
Բնականաբար, շերտավոր խմորը կարող եք ինքներդ պատրաստել: Սակայն, քանի որ այս ուտեստը հատկապես նրանց համար է, ովքեր ցանկանում են արագ ինչ-որ բան պատրաստել, ապա, նախընտրելի է պարզապես խանութից գնել պատրաստի խմորը, բերել տուն եւ թողնել մի քանի ժամ՝ սենյակային ջերմաստիճանում, որպեսզի մի փոքր փափկի:
Գրտնակով բացել խմորը եւ կտրատել շրջանաձեւ: Եթե չունեք համապատասխան «ֆորմաներ»՝ փոքր բաժակներով նույնպես կարող եք կտրել խմորը:
Ջեռոցի տապակի վրա յուղաթուղթ փռեք, խմորի շրջանակները դրեք վրան: Ձուն լավ հարեք եւ վրձինով քսեք խմորի վրա: Վրան ծովի խոշոր աղ, չորացրած կանաչի, կարմիր աղացած պղպեղ ցանեք (պարտադիր չէ):
Խմորի շրջանակների մի մասի վրա բրինզա կամ ֆետա տեսակի պանիրը կտորների բաժանեք, դրեք ամեն շրջանակի վրա մի կտոր պանիր, կողքը՝ տանձի մի շերտ:
Մյուս մասի վրա դրեք մեկական թեյի գդալ «պեստո» թանձրուկ, որի վրա էլ՝ ընկույզ կամ պիստակ: «Պեստո» թանձրուկը վաճառում են սուպերմարկետներում, սակայն կարող եք ինքներդ էլ պատրաստել՝ կանաչ ռեհանը (բազիլիկ), ձիթապտղի յուղը, մայրու ընկույզը (кедровый орех) եւ պարմեզան պանիրը հարում եք ձեռքի բլենդերով: Սրա ավելի մատչելի տարբերակը՝ բազիլիկը փոխարինում եք մաղադանոսով, մայրու ընկույզը՝ սովորական ընկույզով կամ պիստակով, պարմեզանը՝ ցանկացած պինդ, դեղին պանրով, ձիթապտղի յուղը պետք չի փոխարինել:
Դրեք արդեն իսկ 200-220 աստիճան տաքացրած ջեռոցը՝ 10-13 րոպեով:
Մատուցարանի մեջ դրեք պատրաստի կարկանդակները, կողքը՝ խաղող, ընկույզ կամ պիստակ եւ ֆետա պանիր: Մատուցեք գինու հետ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
