2015թ. ՀՀ Սահմանադրական փոփոխությունների հանրաքվեի օրը հանձնաժողովականների աշխատանքը խոչընդոտելու եւ նրանցից մեկի հանդեպ բռնություն գործադրելու մեջ մեղադրվող քաղաքացիական ակտիվիստ Հակոբ Դեխնավիի գործով հերթական դատական նիստն այսօր չկայացավ՝ դատարանների տեղափոխության գործընթացով պայմանավորված:
Դեխնավիի շահերի պաշտպան, փաստաբան Դավիթ Գյուրջյանն (լուսանկարում) Aravot.am-ի հետ զրույցում տեղեկացրեց, որ առաջիկա նիստերում պետք է որպես վկա հարցաքննվեն երկու հանձնաժողովականներ:
«Նրանց հարցաքննությունները կարող են մեզ արդյունք տալ: Ըստ այդմ, մեր առաջիկա քայլերը պարզ կլինեն: Մենք ապացույցներ՝ տեսանյութեր ունենք ներկայացնելու, որոնք հիմնավորում են Հակոբ Դեխնավիի անմեղությունը»,-նշեց Դավիթ Գյուրջյանը:
Նա չմանրամասնեց, թե ինչ տեսանյութերի մասին է խոսքը, քանի որ պաշտպանական մարտավարությունն այս փուլում ճիշտ չէ բացահայտել: «Միայն կարող եմ ասել, որ դրանք տեղեկատվություն են պարունակում դեպքի իրական հանգամանքների կապակցությամբ»,-ասաց Դավիթ Գյուրջյանը:
Հիշեցնենք, որ Հակոբ Դեխնավին մեղադրանքը չի ընդունում եւ պնդում է, որ իրականում հանձնաժողովականն է իրեն հարվածել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
