«Ադրբեջանցիների կողմից անգամ շնորհավորանքներ եմ ստացել…ասում էին՝ «տա աստված, որ նույնը մեր մոտ կրկնվի»: Դա նշանակում է, որ Ադրբեջանում մեծ դժգոհություն եւ անվստահություն կա իրենց իշխանությունների նկատմամբ: Այսօր Ադրբեջանի հասարակությունը հասկանում է, որ Հարավային Կովկասում իրենք միակն են, որ զուրկ են ժողովրդավարությունից»,-«Հենարան» մամուլի ակումբում այսօր լրագրողների հետ հանդիպմանն ամփոփելով «Իմ քայլը» շարժման ձեռքբերումների մասին ներադրբեջանական դիրքորոշումները, ասաց Ադրբեջանի հարցերով փորձագետ Աշոտ Մովսիսյանը:
«Ի դեպ, Ադրբեջանում սկսեցին շրջանառել թեզը, թե Նիկոլ Փաշինյանը Մոնթե Մելքոնյանի հետեւորդն է»,-հավելեց նա:
Նրա խոսքով՝ Ադրբեջանում հիմա վախեր կան, որ սրացումներ կարող են լինել նաեւ իրենց մոտ. «Այդ երկրում տարեցտարի կուտակվող ճնշումները մի օր բերելու են հանրության պոռթկումին: Եթե նման գործողություններ լինեն, Ադրբեջանի ղեկավարության դիրքորոշումը զանգվածային ցույցերի հանդեպ չի լինի այնպիսին, ինչպիսին ՀՀ-ում եղավ: Ադրբեջանի իշխող կլանը ավելի շատ պահելու բան ունի, քան ՀՀ իշխանությունը: Ադրբեջանում իշխանությունը մի քանի կլանի ձեռքում է, եւ ամեն մեկը փորձելու է իրենը պահել»:
Աշոտ Մովսիսյանի համոզմամբ՝ չի բացառվում, որ զանգվածային ցույցերի պարագայում Ադրբեջանում անգամ բանակը դուրս կբերեն ժողովրդի առաջ, քանի որ օրենքն արդեն դա թույլ է տալիս. «Ադրբեջանում լուրջ ներքին զորքեր ունեն, ի տարբերություն Հայաստանի, ուստի իշխանության թիվ մեկ հենարանը ուժային կառույցներն են»:
Լուիզա ՍՈՒՔԻԱՍՅԱՆ
