«Սասնա ծռերի» գործով հերթական դատական նիստում այսօր ամբաստանյալներից ազատամարտիկ Պավել Մանուկյանը, դիմելով դատավոր Մեսրոպ Մակյանին, անսպասելի հայտարարություն արեց, որն անակնկալ էր ոչ միայն մյուս ամբաստանյալների, այլեւ նիստին հետեւող քաղաքացիների համար: Նա խոսեց ամբաստանյալներից Սմբատ Բարսեղյանի եւ Արմեն Բիլյանի մասին, որոնք, հիշեցնենք, մեղադրվում են ոստիկանների սպանության համար. Սմբատ Բարսեղյանին երկու, իսկ Բիլյանին՝ մեկ ոստիկանին սպանության մեղադրանք է առաջադրված: Հիշեցնենք, որ ՊՊԾ գնդի գրավման օրը եւ դրան հաջորդած օրերին որոշակի հանգամանքներում զոհվել են ոստիկաններ Յուրի Տեփանոսյանը, Գագիկ Մկրտչյանը եւ Արթուր Վանոյանը:
«Բիլյանը եւ Բարսեղյանը մեղադրում են այնպիսի հանցանքների մեջ, որոնց հետ նրանք ոչ մի կապ չունեն: Այս դահլիճում են գտնվում պատահական կրակոց արձակած անձինք, որոնց կալանքը դուք փոխել եք: Պատահական կրակոցից ձեռքից վիրավորված անձը հետագայում մահացավ արյան վարակից(նկատի ունի վիրավորված ոստիկաններից մեկին): Պատահական կրակոցի հեղինակը Էդվարդ Գրիգորյանն է, որի համար հիմա պատժվում է Արմեն Բիլյանը: Մեկ էլ՝ բանկոմատ բացելու խնդիր են ասում: Դրա հեղինակն էլ մեր սիրելի ընկեր Մխիթար Ավետիսյանն է»,-հայտարարեց Պավլիկ Մանուկյանը: Հիշեցնենք, որ ՊՊԾ գնդի տարածքում բանկոմատի հափշտակության մեղադրանք է առաջադրված խմբի անդամներից մի քանիսին, որոնց թվում Մխիթար Ավետիսյանը չկա: Նկատենք, որ Պավլիկ Մանուկյանը «պատահական կրակոց» արտահայտությունը հոգնակի թվով անձանց վերագրեց, ուստի նրա ասածից պարզ չդարձավ, թե մյուս կամ մի քանի այլ «պատահական» կրակոցի հեղինակը կամ հեղինակներն ովքեր են:
Նիստի ընդմիջմանը լրագրողները տեղեկատվությունը ճշտեցին Ավետիսյանի եւ Գրիգորյանի հետ: Հիշեցնենք, որ նրանք վերջերս կալանքից ազատվել են: Մխիթար Ավետիսյանը վստահեցրեց, որ Պավլիկ Մանուկյանի ասածներն իրականությանը չեն համապատասխանում: Նույնը կրկնեց նաեւ Էդվարդ Գրիգորյանը: Պավլիկ Մանուկյանը նշյալ հայտարարությունն անելիս նաեւ մատնանշել էր, որ ինքը դեմ է կեղծիքին եւ ցանկանում է, որպեսզի արդարություն լինի:
Լուիզա ՍՈՒՔԻԱՍՅԱՆ
Լուսանկարում՝ ամբաստանյալներ Սմբատ Բարսեղյանը, Մխիթար Ավետիսյանն ու Սեդրակ Նազարյանը
