ԱԺ «Իմ քայլը» խմբակցության պատգամավոր Արսեն Ջուլֆալակյանն այսօր խորհրդարանում կառավարության անդամներին ուղղված հարցերի շրջանակում բարձրաձայնեց, որ սպորտի մարզիչները սոցիալական փաթեթ չունեն. «Հասկանում եմ, որ գուցե մարզիչները մեծ թիվ են կազմում, բայց կարելի է լուծում գտնել՝ սկզբի համար սոցփաթեթ նախատեսելով գլխավոր մարզիչներին՝ 70 հոգի: Մարզիչներն էլ են մանկավարժ, իսկ մանկավարժն օգտվում է սոցփաթեթից: Բացի այդ, մեր ազգային հավաքականներն անհասկանալի տեսքի եւ որակի մարզահագուստ են ստանում: Գումարը պետք է ավելի որակյալ եւ գեղեցիկ ապրանքի վրա ծախսել»:
Պատգամավորի մտահոգությանն արձագանքեց ՀՀ Սպորտի եւ երիտասարդության հարցերի նախարարի առաջին տեղակալ Գաբրիել Ղազարյանը. «Հարցը լուրջ է: Եթե մանկավարժն օգտվում է սոցփաթեթից, ապա սպորտի մանկավարժները եւս պետք է օգտվեն: Մենք քննարկել ենք այդ հարցը: Հաշվի առնենք, որ մարզիչների մեծ թիվ կա, ուստի հարցը քննարկման փուլում է: Ինչ վերաբերում է համազգեստներին, ապա դրանք վերանայվել են. դա այն խնդիրներից է, որն այս պահին հնարավոր չէ մեծածավալ կերպով լուծել: Վստահ եմ, որ 2020թ.-ին մեր հավաքականները կունենան ավելի որակյալ եւ մեծ թվով համազգեստներ»:
Արսեն Ջուլֆալակյանը հավելեց, որ իր կապերով օգտակար կլինի, որպեսզի ավելի որակյալ համազգեստ գնվի:
Լուիզա ՍՈՒՔԻԱՍՅԱՆ
