Ապրիլի 5-ին Ավ. Իսահակյանի անվան Կենտրոնական գրադարանում հայ գրականության սիրահարներին մի հարկի տակ էր հավաքել նկարիչ, գրող Սեդա Բեքարյանը՝ ներկայացնելով իր «Կարամելը` ձնաբքի մեջ» գիրքը:
Գիրքը պատմվածքների ամբողջություն է, ըստ հեղինակի՝ այն գրելու ցանկություն առաջացել է այն ժամանակ, երբ պահն էր հասել մի գրքույկի մեջ հավաքել իր բոլոր ցաքուցրիվ գրի առնված մտքերը: Գիրքը ներկայացնում է վավերագրություն. հեղինակը խոսում է իր սիրելիների, իր շրջապատի մարդկանց, ուղղակի ծանոթների, մեր պապերի կորուսյալ հայրենիքի և նաև Երևանի մասին:
Պատմվածքներից են «Առնետը», «Հռոմեացի նախապապեր ունեցող մարդը», «Կարամելը ձնաբքի մեջ», «Բացվեցին գարնան առաջին ծաղիկները» և այլն, ընդհանուր թվով քսանհինգն են: Այսքան պատմվածքների մեջ գրքի անունը ինչու է հենց «Կարամելը` ձնաբքի մեջ», հեղինակը մեկնաբանեց. «Կարամելը կոնֆետն է, պատմվածքի միտքը այն է, որ կոնֆետը որքան էլ լինի ձնաբքի մեջ, միևնույն է, մնում է նույն համին և տեսքին…»:
Սեդա Բեքարյանը գրքում մեծ տեղ է հատկացրել իր հոր՝ նկարիչ Արա Բեքարյանի մտքերին՝ տարբեր ժամանակներում ասված: Օր՝. «Մենք մտածում ենք… մտածում, իսկ կատարվում է այն, ինչ կատարվում է: Վերելակը շնչակտուր վազեց վերև: Համեստ խոսող. դրա համար ամենալավը լռելն է: Ոչ միայն պիտի հոգով գրել, այլև լավ գրել»:
Կարդացեք նաև
Միջոցառման ընթացքում խոսեցին հեղինակի մտերիմները, հարազատները: Նրանցից արձակագիր Սեյրանուհի Գեղամյանը ասաց. «Սեդա Բեքարյանին նախապես ճանաչել եմ որպես նկարիչ և շատ սիրել եմ իր խաղաղ, բարի մթնոլորտը, մեր բնությունը ներկայացնող գույների խաղը: Նրա գիրքն էլ լցված է գեղեցիկին սպասելու ձգտումով»:
Հենց ինքը՝ Սեդա Բեքարյանն էլ մտածում է, որ ինքը գրող չէ, այլ ուղղակի գրում է, քանի որ չի կարող չգրել: Մանկության տարիներին, երբ տեսել է գաղթական մարդկանց նրանց դժբախտությունը որոշել է, որ աշխարհը մի օր պետք է իմանա նրանց մասին, իր հերոսների մասին:
Մերի ՀԱՅՐԱՊԵՏՅԱՆ
