Երեխային պատվաստե՞լ, թե՞ ոչ: Այս հարցի շուրջ կան հակասական կարծիքներ: Aravot.am-ը թիվ 2 բուժմիավորման մանկաբույժ Աշխեն Մհերյանից հետաքրքրվեց՝ ի վերջո երեխաներին պատվաստե՞լն է ճիշտ, թե՞ չպատվաստելը:
Հորդոր ծնողներին՝ երեխաներին անպայման պատվաստեք
Աշխեն Մհերյանի տեղեկացմամբ՝ ամեն տարի հանդիպում ենք շատ վարակիչ հիվանդությունների, որոնք կարող են հանգեցնել ծանր հետևանքների: Մանկաբույժը ծնողներին զգուշացրեց, որ այժմ էլ ՀՀ-ում կան կարմրուկի սուր դեպքեր, ուստի հորդորեց բոլոր ծնողներին, որոնց երեխաները կարմրուկի դեմ պատվաստված չեն, արագ տանեն պատվաստումների:
Մանկաբույժին փոխանցեցինք ծնողների այն մտահոգությունը, որ պատվաստանյութերը ըստ նրանց անվտանգ չեն, երբեմն նաև ժամկետանց, նա պատասխանեց. «Պատվաստումներն ամենաապահով, արդյունավետ, ամենաանվտանգ առողջապահական միջամտություններից են, որոնք այսօր իսկապես հնարավոր են: Մեզ շատ օգնում է ՄԱԿ-ի մանկական հիմնադրամը՝ ՅՈՒՆԻՍԵՖ-ը: Նրանց կողմից ենք ստանում պատվաստանյութեր: Ուզում եմ ծնողներին հիշեցնել, որ աշխարհում միայն կարմրուկի բռնկումների ընթացքում ամեն շաբաթ երկու երեխա է մահանում: Նախ այդ պատվաստանյութերն այնքանով են անվտանգ, որ նախքան շուկա դուրս գալն անպայման ենթարկվում են փորձարկման և հետազոտության, և նախապես այդ բարդությունների մասին անպայման գրվում է այդ պատվաստանյութերի մեջ, թե որից հետո ինչ կարող է լինել: Այդ պատվաստումներն առողջապահության հրաշքներից են: Վերջին երկու տասնամյակում 20 միլիոն կյանք է փրկվել, քանի որ պատվաստումները ժամանակին են արվել: Իսկ նախկինում ամեն շաբաթ երկու-երեք երեխա անպայման մահանում էր կարմրուկի բռնկումից»:
Կարդացեք նաև
Որ տարիքում ի՞նչ պատվաստումներ պետք է ստանան երեխաները
Մանկաբույժի տեղեկացմամբ՝ ՀՀ-ում պատվաստումների օրացույցում ընդգրկված են բոլոր հիվանդությունները: Նա նշեց տուբերկուլոզը՝ պալարախտ, թոքախտ: Այս հիվանդության դեմ պատվաստումը՝ ԲՑԺ-ն, երեխան ստանում է անմիջապես ծննդատանը: Մյուս պատվաստումը վիրուսային հեպատիտն է՝ լյարդի բորբոքում: Հարուցիչը թափանցում է արյան միջոցով բժշկական միջամտությունների, ներարկման, վիրաբուժական, նույնիսկ սեռական ճանապարհով: Դրա համար անհրաժեշտ է վիրուսային հեպատիտ B պատվաստանյութ ստանալ: Իսկ ամենածանր վարակներից է պոլիոմելիտը: Այդ ծանր վիրուսային հիվանդությամբ հիվանդանում են ցանկացած տարիքում, բայց ավելի հաճախ երեք տարեկան երեխաները: Իսկ թե որ տարիքից են սկսում պատվաստումները, մանկաբույժը մանրամասնեց. «Վարակիչ հիվանդությունների պատվաստումները սկսվում են մեկուկես ամսականից: Անպայման, եթե երեխան առողջ է և հաճախակի այցելում է մանկաբույժի մոտ, մայրիկին մանկաբույժը նախօրոք տեղեկացնում է, թե որ պատվաստանյութն է, ինչի համար, որ երկրից, քանի վալենտն է: Մեկուկես ամսականում երեխան ստանում է պոլիոմելիտ, փայտացում, կապույտ հազ, դիֆտերիա, հեփատիտ Բ և պնևմակոկային վարակ, ռոտա վիրուսի դեմ պատվաստումները:
Երկրորդ պատվաստումն արվում է երեք ամսականում՝ 12 շաբաթականում: Այդտեղ մտնում է դիֆտերիան, հեմոֆիլուսը, պոլիոմելիտը, ռոտա վիրուսը, պնևմակոկը, և այդ նույն պատվաստանյութը ներարկվում է երեք անգամ:
Երրորդ պատվաստանյութը ներարկվում է 4,5 ամսականում: Իսկ 12 ամսականում մենք պատվաստում ենք կարմրուկի, կարմրախտ և խոզուկի դեմ»:
Մանկաբույժը բնական է համարում այն, որ պատվաստումների դեպքում երբեմն երեխաներն ունենում են ջերմություն: Իսկ եթե այն տևում է երկու-երեք օր, ապա պետք է դիմել բժշկի: Բժիշկը խորհուրդ է տալիս՝ ջերմության դեպքում երեխային պետք է տալ լրացուցիչ հեղուկ: Չի բացառվում, որ պատվաստման օրերը որևէ հիվանդության հետ համընկնում է: Մանկաբույժը խորհուրդ է տալիս հատկապես ալերգիկ երեխաների համար տանն ունենալ անտիգեստամինային պրեպարատներ՝ օրինակ՝ Ֆենիստիլ: Կարելի է ըստ ամսականների Ֆենիստիլի կաթիլներ տալ երեխային պատվաստումից առաջ:
Գրիպի դեմ պատվաստումների արդյունավետությունը
Աշխեն Մհերյանի համոզմամբ՝ գրիպի պատվաստումները պետք է անել ժամանակին. «Եթե ժամանակին չի արվում, արդեն վիրուսային ինֆեկցիան կա շրջապատում, հանրապետությունում, դա իմաստ չունի: Երեխային գրիպային պատվաստումներն արվում են վեց ամսականից մինչև 60 տարեկան տարիքային խումբ: Ես այնքան էլ շատ կողմնակից չեմ գրիպի հետ կապված պատվաստումներին, քանի որ որքանով կարող ենք որոշել, թե որ վիրուսն է այս տարի լինելու: Մենք ամեն տարի գրիպի պատվաստանյութերը միշտ ուշացած ենք ստանում, մինչդեռ հոկտեմբեր-նոյեմբեր ամիսներին պետք է սկսենք պատվաստումները»:
Հարցին՝ ծնողները հիմա ավելի շա՞տ են իրենց երեխաներին տանում պատվաստումների, քան նախկինում, մանկաբույժը պատասխանեց. «Նախկինում ավելի շատ հրաժարվողներ կային և անհիմն: Ոչ մի կազմակերպություն, ոչ մի բժիշկ չի կարող ստիպել ծնողին, որպեսզի նա անպայման բերի երեխային, պատվաստի: Օրենսգրքով այդ իրավունքը չկա: Բժիշկը միայն կարող է բացատրել, հասկացնել, թե չպատվաստելն ինչ բացասական հետևանքների կարող է հանգեցնել»:
Տաթև ՀԱՐՈՒԹՅՈՒՆՅԱՆ
