«Սա տոտալ խոշտանգման դասական օրինակ է, այսպես չի մնալու»,- այսօր դատական նիստի ավարտից հետո լրագրողների հետ զրույցում հայտարարեց Մանվել Գրիգորյանի պաշտպան Լեւոն Բաղդասարյանը:
Հիշեցնենք, երեկ գիշեր նրա պաշտպանյալին «Նաիրի» ԲԿ-ից տեղափոխել էին դատապարտյալների հիվանդանոց, Մանվել Գրիգորյանը հրաժարվել էր այնտեղ շարունակել բուժումը, ինչի արդյունքում տեղափոխել էին ՔԿՀ: Ավելի ուշ նրա առողջական վիճակը վատթարացել էր եւ ՔԿՀ-ից տեղափոխել էին դատապարտյալների հիվանդանոց:
Պաշտպանը լրագրողների հետ զրույցում մանրամասնեց, որ դատապարտյալների հիվանդանոցից գրություն են ուղարկել «Նաիրի» ԲԿ, որ կարող են համապատասխան բուժում ապահովել: Հիշեցրեց, որ մի քանի ամիս առաջ էլ էր նման բան եղել, Մանվել Գրիգորյանը հրաժարվել էր դատապարտյալների հիվանդանոցում բուժում ստանալուց, պաշտպանական կողմն էլ դիմել էր ՄԻԵԴ, ինչից հետո, պետությունն ինքը կամավոր կերպով իրացրել էր դատապարտյալի իրավունքը եւ պաշտպանական կողմը հրաժարվել էր բողոքից:
«Ի վերջո, անձի սահմանադրական իրավունքն է որոշել, թե որ հիվանդանոցում եւ ինչ միջոցներով բուժում ստանա»,- ասաց պաշտպանը`հավելելով, որ «Նաիրի» ԲԿ-ում էլ ոչ բոլոր դեղամիջոցները կային եւ Գրիգորյանի հարազատներն էին հոգում այդ հարցը:
Կարդացեք նաև
Ավելի ուշ պաշտպանն ասուլիսով հանդես կգա եւ առավել մանրամասն տեղեկություններ կհայտնի Մանվել Գրիգորյանի առողջական վիճակի մասին:
Փաստաբանն ասաց, որ իրենք հակված են դատավարի առաջարկին`շաբաթական երկու անգամ նիստ գումարել եւ եթե Մանվել Գրիգորյանի առողջական վիճակը ների, երկու անգամն էլ նիստերը կգումարվեն:
Նելլի ԳՐԻԳՈՐՅԱՆ
