ԲՈԿ-ի նախագահ Սմբատ Գոգյանը «Մեդիա կենտրոնում» պատասխանելով այն հարցին, թե իր պաշտոնավարման ընթացքում գրագողության քանի դեպք է հայտնաբերել, քանի ատենախոսություն է մերժվել կամ հետ ուղարկվել խորհուրդներ, պատասխանեց. «Հստակ թիվը չեմ կարող ասել, թե քանի գործ է մերժվել, բայց արդեն առաջին դեպքը կա, որ հայցորդը նորից դիմել է պաշտպանության համար: Գործող կարգով, եթե մարդուն մերժում են, նա իրավունք ունի մեկ տարի հետո կրկին դիմել, եւ հիմա գրագողության հետքերը վերացնելով դիմել է: Ցավոք մասնագիտական խորհուրդը կհաստատի, եւ չենք կարողանա դեմն առնել:
Մասնագիտական հանրությունը պետք է ասի, որ քո աշխատանքի մեջ գիտական արժեք չկա: Գնահատելով գրագողության ծավալն ասեմ, որ այս տարվա հունվարից մայիս ամիսներին 60 հոգի է ատենախոսություն պաշտպանել, անցյալ տարի այդ թիվը 110 է եղել: Մենք կարող ենք ենթադրել, որ այդ 50 չպաշտպանածի զգալի մասն իրենց ատենախոսության մեջ ունեցել է գրագողություն եւ հիմա վերաշարադրում է, վերախմբագրում է, փորձում է նորից դզել»:
ԲՈԿ նախագահի խոսքերով. «Մենք գործ ունենք ոչ թե ատենախոսությունների թվի նվազման հետ, այլ պրոբլեմատիկ ատենախոսություններն ուղղակի չեն գալիս, դրանք կդզվեն եւ մեկ տարի անց նորից կներկայացվեն: Կարող ենք ասել, որ 50 տոկոս ատենախոսների դեպքում մենք գործ ունեինք գիտական նորույթի բացակայության եւ գրագողության հետ»:
Սմբատ Գոգյանն ասաց, որ իր համար շշմեցուցիչ էր, երբ վերջերս մեկի ատենախոսությունը մերժեցին. «Նա բողոք ներկայացրեց, հանձնաժողով ստեղծեցին, որն էլ ավելի շատ գրագողության աղբյուրներ հայտնաբերեց ատենախոսության մեջ, փաստորեն 75 էջից 50-ը գրագողություն էր, բայց այժմ այդ մարդը պատրաստվում է մեզ դատի տալ: Ասում է` դուք իրավունք չունեք մեզ մերժելու»
Կարդացեք նաև
Գոհար ՀԱԿՈԲՅԱՆ
