Թաիլանդի Թագավորության Պատտայա քաղաքում ավարտվեց ծանրամարտի աշխարհի առաջնությունը:
Մրցակցային եզրափակիչ օրը մրցահարթակը տրամադրվեց տղամարդկանց գերծանր՝ +109 կգ քաշայիններին: Մոլորակի հսկաների պայքարի մեջ էին նաեւ Հայաստանի ազգային հավաքականի անդամներ Գոռ Մինասյանն ու Ռուբեն Ալեքսանյանը:
Վերջին տարիների աշխարհի ամենաուժեղ մարդու՝ Վրաստանի ներկայացուցիչ Լաշա Տալախաձեի հետ, որին պատկանում են բոլոր ռեկորդները, դժվար էր ոսկու համար պայքարելը:
Գյումրեցի Գոռ Մինասյանը պոկում վարժությունում 212 կգ-ով արժանացավ փոքր արծաթի, հրում վարժությունում գլխավերեւում պահեց 248 կիլոգրամը (կրկին 2-րդ ցուցանիշ) եւ երկամարտի 460 կիլոգրամով դարձավ աշխարհի առաջնության արծաթե մեդալակիր:
Կարդացեք նաև
Դրամատիկ ընթացավ մեր երկրորդ հսկայի՝ Ռուբեն Ալեքսանյանի պայքարը: Պոկում վարժությունում նա միայն երրորդ մոտեցմամբ կարողացավ բարձրացնել 192 կգ-ն (6-րդ տեղ): Սակայն նա պայքարի մեջ էր: Իր նախասիրած հրում վարժությունը սկսելով 241 կիլոգրամից՝ Ռուբենը, այնուհետեւ, իր կամքին ենթարկեց 245 կգ ծանրաձողը, ինչը նրա համար ապահովեց հրում վարժության՝ փոքր եւ երկամարտի՝ 437 կգ բրոնզե մեդալները:
Աշոտ ՀԱԿՈԲՅԱՆ
