Ամանորի եւ Սուրբ Ծննդյան տոնակատարությունների ժամանակ գրեթե բոլորս էլ այնքան քաղցրավենիք ենք կերել, որ ոչ միայն քաշ ենք ավելացրել, այլեւ հագեցել ենք տարբեր տեսակի խմորեղեններից ու կոնֆետներից: Այսօր առաջարկում եմ պատրաստել այս էներգետիկ կոնֆետները, որոնք բավականին սննդարար են, միեւնույն ժամանակ՝ ոչ այնքան վնասակար, որքան թխվածքները: Այս էներգետիկ կոնֆետները կարող են փոխարինել նախաճաշը, ինչպես նաեւ՝ դառնալ աշխատանքային ժամերին արագ ու թեթեւ ընդմիջում անելու լավ տարբերակ:
Անհրաժեշտ մթերքները
Վարսակի փաթիլներ («հերկուլես»)- 0,5 բաժակ (վերցրեք միայն ավանդական փաթիլները, որոնք 15-20 րոպե եփվելու համար են, արագ պատրաստվող վարսակի փաթիլները օգտակար չեն)+ եւս 2 գդալ՝ թաթախելու համար
Ծիրանի եւ սալորի չիր, չամիչ կամ լոռամրգի չիր – 0,5 բաժակ (նախընտրելի է վերցնել բնական չրեր եւ ոչ թե ցուկատներ՝ շաքարած մրգեր)
Կարդացեք նաև
Ընկույզի տեսականի՝ նուշ, գետնանուշ, կաղին, ընկույզ- 0,5 բաժակ
Կտավատի սերմեր-1 ճաշի գդալ
Գետնանուշի մածուկ- 3 ճաշի գդալ
Պատրաստման եղանակը
Չրերը եւ ընկույզները մանր կտրատեք, խառնեք կտավատի սերմերի եւ վարսակի փաթիլների հետ: Ավելացրեք գետնանուշի մածուկը: Գետնանուշի մածուկ վաճառում են սուպերմարկետներում, սակայն ինքներդ էլ կարող եք պատրաստել: Պատրաստման եղանակը կարող եք գտնել այստեղ:
Լավ խառնեք, գդալով գնդիկներ ձեւավորեք: 1-2 ճաշի գդալ վարսակի փաթիլներ լցրեք ափսեի մեջ, գնդիկները թաթախեք մեջը: Գնդիկները շարեք յուղաթղթի վրա, դրեք սառնարան առնվազն 1 ժամով:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
