«Ընդհանուր առմամբ քննարկվել են գալիք նստաշրջանին առնչվող հարցեր եւ մեր ծրագրերն այս տարվա համար»,-«Իմ քայլը» խմբակցության փակ նիստի ավարտին այսօր լրագրողների հետ զրույցում ասաց խմբակցության պատգամավոր Անուշ Բեղլոյանը։
Նա անդրադարձավ նաև ԱԱԾ նախկին ղեկավար Արթուր Վանեցյանի եւ Փաշինյանի դստեր միջեւ հեռակա բանավեճին` նշելով. « Կարծում եմ` մեր երկրում խոսքի ազատությունը շատ բարձր մակարդակի վրա է։ Ցանկացած անձ իրավունք ունի իր կարծիքը հայտնելու, լրատվամիջոցն էլ իրեն հասանելի տեղեկատվության հիման վրա իրավունք ունի գրելու հոդվածներ և հետեւություններ անել։ Որեւէ արտառոց բան տեղի չի ունենում, դա նորմալ երկխոսություն է։ Վարչապետի դուստրը ՀՀ քաղաքացի է եւ իրավունք ունի խոսել։ Ես այդ ցավագին արձագանքը չեմ հասկանում եւ չեմ ընդունում։ Դա արհեստական ուռճացված է։ Այդ տեղեկությունը եւ մարդու կարծիքը պետք է հարգել, մնալ քաղաքավարության շրջանակներում եւ ուղղակի ընդունել քննադատությունն ու այն տեղեկությունները, որոնք ազատ մամուլը տարածում է։ ՀԺ-ն հեղինակավոր թերթ է։ Այն չի հրապարակում տեղեկություններ, որի վերաբերյալ չունի փաստեր»:
Հիշեցնենք, որ ըստ «Հայկական ժամանակ»-ի` Վանեցյանը մի շարք այլ նախկին պաշտոնյաների հետ վարչապետի ընտանիքի դեմ հակաքարոզչություն է իրականացրել։
Լուիզա ՍՈՒՔԻԱՍՅԱՆ
