Կորոնավիրուսի համավարակը պատճառ դարձավ, որպեսզի ամերիկյան նշանավոր մի շարք հաղորդաշարեր հեռարձակվեն տնից, հաղորդավարների աշխատաոճը փոխվի ինքնամեկուսացման պատճառով:
Նման փորձ է արել նաեւ Խ. Աբովյանի անվան մանկավարժական համալսարանը, ինչի առիթով էլ զրուցեցինք համալսարանի «Հաջողության բանաձեւ» հաղորդաշարի պրոդյուսեր, խմբագիր, լրատվության և հանրության հետ կապերի վարչության պետ Դիանա Մարկոսյանի հետ:
«Մանկավարժական համալսարանն արդեն շուրջ 5 տարի, որպես ուսուցման հետաքրքիր և արդյունավետ միջոց, օգտագործում է Google Classroom հարթակը։ Եվ այս օրերին, երբ այն հնարավորություն տվեց ուսուցման պրոցեսը շարունակելու, ավելի քան հեշտությամբ, մի քանի գործառույթ ավելացնելով մեր աշխատանքին, անցանք հեռավար ուսուցման ձևին։ «Հաջողության բանաձև» հաղորդաշարի ստեղծագործական թիմն իր առջև խնդիր դրեց հենց հեռավար մեթոդով պատրաստել հաղորդումը հեռավար կրթության մասին՝ ապացուցելով, որ անհնարին գրեթե ոչինչ չկա։
Մի քանի ժամում թիմը համախմբեց իր ուժերը և առցանց տիրույթում՝ ռեժիսորը իր գործն անելով, օպերատորը իր աշխատանքով, խմբագիրը՝ տեքստի խմբագրմամբ և հաղորդավարը հեռախոսով ձայնագրվելու միջոցով, հյուրը՝ իր տնից, երկու հաղորդավարները՝ իրենց տներից, պատրաստեցինք նյութերը և ուղարկեցինք մոնտաժային աշխատանքների։ Միակ բարդությունը, որին հանդիպեցինք, համացանցի գերծանրաբեռնվածությունն էր, հետևաբար՝ արագությունը։ Ինչևէ։ Գործը արվեց, և մենք ապացուցեցինք, որ կարելի է հասնել ցանկալի արղյունքի, եթե կա նպատակ»,-Aravot.am-ի հետ զրույցում հայտնեց Դիանա Մարկոսյանը։
Կարդացեք նաև
Նաեւ հավելեց, որ առցանց պայմաններում հաղորդում պատրաստելու գաղափարը հաղորդման ռեժիսոր Արտյոմ Աղասարյանին է պատկանում:
Գոհար ՀԱԿՈԲՅԱՆ
