«Հոդված 3» ակումբի կազմակերպած «Ատելության խոսքը սոցիալական մեդիայում. հայաստանյան իրողություններ» թեմայով տեսաքննարկմանը Մեդիա նախաձեռնությունների կենտրոնի media.am կայքի խմբագիր Գեղամ Վարդանյանը ատելության խոսքի դեմ պայքարի մասին խոսելիս կարևորեց ընդհանրապես չափման խնդիրը: Նա նշեց. «Ընդհանրապես, Հայաստանում և′ խորհրդարանում, և′ կառավարությունում, և′ հանրային խոսքում չափված խոսելը և հետազոտության հիման վրա խոսելն ավելի քիչ է, ինչն այնքան էլ լավ չէ»:
Ըստ նրա, երբ խոսում ենք սոցիալական ցանցերում ատելության խոսքի աճի մասին, մենք պետք է մտածենք, հասկանանք, թե ոնց ենք ասում, որ դա աճել է: Գեղամ Վարդանյանի համոզմամբ՝ նույն կերպ կարող ենք ասել, որ աճել է սոցցանցերում ապրող մարդկանց ու դրանցից օգտվողների թիվը: Փորձագետի կարծիքով՝ նախ պետք է սահմանվի՝ ինչ է ատելության խոսքը, որ ամեն բզզոց չհամարվի ատելության խոսք. «Օրենսդրական կարգավորումներն այդ հարցի լուծման դեպքում կարող են սահմանումների հետ կապված օգտակար լինել կամ կոնկրետ դեպքերի քննարկման ժամանակ: Սոցցանցը մեր կյանքի մի մասն է, և եթե համեմատելու լինենք, ապա այնպես չէ, որ ՀՀ-ում այն ցանցում, որն ունեինք 2008-ին, շիկացած մթնոլորտ չկար և այս ձևակերպումներով ու ընկալմամբ ատելության խոսք չկար: 2013-ին էլ կար. այնպիսի ծաղրանկարներ ու ատելության խոսքի տարրերով ֆոտո, վիդեոներ անողներ կային, որ այս վերջին երկու տարում ատելության խոսք ասողները կզարմանային»:
Գեղամ Վարդանյանը ցավով փաստեց՝ ատելության խոսք եղել է, կա ու կլինի և եզրափակեց. «Մենք ամեն ինչ պետք է անենք դրա կանխման համար: Քաղաքական, հասարակական գործիչները, արվեստի մարդիկ, ընդհանրապես, հայտնի մարդիկ շատ ուշադիր պիտի լինեն իրենց խոսքի նկատմամբ»:
Տաթև ՀԱՐՈՒԹՅՈՒՆՅԱՆ
