«Արմավիր» ՔԿՀ-ում գտնվող Իրանի Իսլամական Հանրապետության (ԻԻՀ) քաղաքացի 29 կալանավորված անձ ու դատապարտյալ երկու օր է հացադուլ են հայտարարել: Նրանք պահանջում են իրենց արտահանձնել Իրան հետագա կալանքը իրենց երկրում կրելու համար:
Aravot.am-ի տեղեկություններով՝ նրանց հանդիպել է Հայաստանում ԻԻՀ դեսպանորդը, սակայն հացադուլավորները չեն դադարեցրել հացադուլը:
Նոնա Նավիկյանի լուսանկարը՝ ֆեյսբուքյան էջից
Լուրը ճշտելու համար դիմեցինք քրեակատարողական ծառայության հանրային կապերի բաժնի պետ, փոխգնդապետ Նոնա Նավիկյանին: Նա մեզ հետ զրույցում հաստատեց հացադուլի լուրը և մանրամասնեց. «Հունիսի 22-ից Արմավիր քրեակատարողական հիմնարկի Իրանի Իսլամական Հանրապետության 16 կալանավորված անձ և 13 դատապարտյալ հացադուլ են հայտարարել: Նրանց պահանջը արտահանձնումն է ԻԻՀ: Հունիսի 23-ին հացադուլ հայտարարած անձանց է այցելել ԻԻՀ դեսպանատան ներկայացուցիչը: Նրանց արտահանձնման գործընթացը, սակայն, քրեակատարողական ծառայության իրավասության շրջանակներից դուրս է»:
Քիչ ուշ Aravot.am-ը կներկայացնի նաև ՀՀ դատախազության պարզաբանումն այս խնդրի կապակցությամբ: Նշենք, որ հացադուլավորները չեն դադարեցրել իրենց հացադուլը:
Կարդացեք նաև
Սա առաջին անգամ չէ, որ նրանք հացադուլ են անում: Նախորդ անգամ նրանց էր հանդիպել ՀՀ ԱԺ մարդու իրավունքների եւ հանրային հարցերի մշտական հանձնաժողովի նախագահ Նաիրա Զոհրաբյանը, որը խնդրի կարգավորման համար դիմել էր արդարադատության նախարարին:
Դավիթ ԱՐՄԵՆՅԱՆ
Տաթև ՀԱՐՈՒԹՅՈՒՆՅԱՆ
