Այո, ամեն հանճարեղ բան պարզ է: Իտալական խոհանոցի ամենահեշտ, անչափ համեղ եւ արագ պատրաստվող ուտեստներից է սպագետի Aglio e olio-ն ՝ սխտորով եւ ձիթայուղով համեմված սպագետին:
Անհրաժեշտ մթերքները
Պատրաստի սպագետի (կարող եք վերցնել այլ տեսակի մակարոնեղեն նույնպես)- 250 գրամ, կես տուփ
Ձիթապտղի յուղ- 3 ճաշի գդալ
Կարդացեք նաև
Կարագ- 20-30 գրամ (պարտադիր չէ)
Սխտոր- 2 պճեղ
Մաղադանոս- 10-12 ճյուղ
Կարմիր չոր կամ թարմ կծու պղպեղ- կես հատ (կարող եք փոխարինել աղացած չիլի պղպեղով)
Պատրաստման եղանակը
Իտալացիները մակարոնեղենի ողջ տեսականուն «պաստա» անունն են տալիս: Պաստաները տարբեր տեսակի են լինում ոչ միայն ձեւով՝ ֆուզիլի, ֆետուչինի, լինգուինի, սպագետի, ուրզո, ֆարֆալե եւ այլն, այլեւ բաղադրությամբ: Յուրաքանչյուր տեսակն ունի պատրաստման իր ժամանակը, որը կախված է նաեւ այն բանից, թե ինչ տեսակի ալյուրից է պատրաստված՝ կարծր տեսակի ցորենի ալյուրով պաստաներն ավելի երկար են եփվում, քան սովորական ալյուրով պատրաստվածները: Այնպես որ՝ անպայման կարդացեք տուփի վրա, թե ինչ ժամանակ է նշված՝ եփելու համար:
Պաստաները պետք է եփել առատ ջրով, հնարավորինս մեծ կաթսայով: Լցրեք ջուրը կաթսայի մեջ, դրեք կրակին, ավելացրեք աղը: Պաստաները եփում են բավականին աղի ջրով, իտալացիներն ասում են, որ պաստայի ջուրը պետք է ունենա ծովի աղիություն: Հենց ջուրը սկսի բլթբլթալ, ավելացրեք սպագետին, թողեք եփվի:
Մինչ այդ պատրաստեք թանձրուկը: Լավ լվացեք մաղադանոսը եւ կտրատեք, պոչի մասն առանձնացրեք: Մաքրեք եւ մանր կտրատեք նաեւ սխտորը:
Թավան դրեք կրակին: Մեջը լցրեք ձիթապտղի յուղը եւ կարագը, ապա՝ սխտորը եւ մաղադանոսի պոչի հատվածը:
Եթե թարմ պղպեղ եք ավելացնելու, ավելացրեք նաեւ պղպեղը: Մեկ-երկու րոպեից թանձրուկը պատրաստ կլինի: Հենց սպագետին եփվի, հանեք ջրից, թողեք ջրքամվի եւ լցրեք թանձրուկով թավայի մեջ, լավ խառնեք, որպեսզի ամբողջությամբ պատվի թանձրուկով: Ավելացրեք նաեւ մնացած մաղադանոսը, մի պտղունց էլ կարմիր աղացած պղպեղ կարող եք ցանել: Մատուցեք տաք-տաք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
