Դպրոցների ողջ անձնակազմը պիտի կորոնավիրուսի թեստ հանձնի, եւ մինչեւ ուսումնական գործընթացի մեկնարկը ուսուցիչների թեստավորումը պիտի ավարտված լինի. այդ մասին ֆեյսբուքյան իր էջում օրեր առաջ նշել էր Կրթության, գիտության, մշակույթի եւ սպորտի փոխնախարար Ժաննա Անդրեասյանը:
Եթե շուրջ 30 հազար ուսուցիչ պիտի թեստավորվի, ապա առաջիկա շաբաթվա ընթացքում մոտ 4000-ից ավելի մարդ ամեն օր պիտի թեստավորվի: Այս ծանրաբեռնվածությամբ կհասցնե՞ն լաբորատորիաները սպասարկել բոլորին, եւ թեստավորել նաեւ այլոց, ում ըստ ցուցումների՝ պետք կլինի թեստ հանձնել. «Հայկական ժամանակ»-ի հարցին ի պատասխան Առողջապահության նախարարության հասարակայնության հետ կապերի բաժնի պետ Լիլիթ Բաբախանյանը նշեց. «Ծանրաբեռնվածությունը, իհարկե, շատ մեծ է, այնուամենայնիվ պլանավորվում է իրականացնել նաեւ լաբորատոր հետազոտություններ՝ ցուցումների դեպքում»:
Այս որոշումը համաճարակային առումով ինչ հիմնավորում ունի, քանի որ նույնկերպ եւ աշակերտները, որ ժամեր շարունակ լինելու են նույն տարածքում, կարող են անախտանիշ վարակակիր լինել. այս հարցին ի պատասխան Բաբախանյանը միայն նշեց. «Որոշումը նվազեցնում է ռիսկի գործոնը»։
Հիշեցնենք, որ կորոնավիրուսի թեստ հանձնելու գնալիս հարկ է նվազագույնը երկու ժամ առաջվանից ոչինչ չուտել, անգամ ջուր չխմել եւ չծխել: Առկա տվյալների համաձայն՝ մինչ սեպտեմբերի 6-ը ուսումնական հաստատությունների անձնակազմի շրջանում թեստավորվել է 2595 անձ։
Կարդացեք նաև
Կարմեն Մարտիրոսյան
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
