«Իմ քայլի» պատգամավոր Մերի Գալստյանն այսօր ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի հանձնաժողովի նիստում ներկայացրեց նոր օրենքի նախագիծ՝ «Կենդանիների նկատմամբ պատասխանատու վերաբերմունքի մասին»: Սա մայր օրենքի նախագիծ է, որի համահեղինակն է նաեւ ԱԺ փոխնախագահ Լենա Նազարյանը:
Նպատակն է բացառել կենդանիներին ցավ պատճառելը, կենդանիների նկատմամբ դաժան վերաբերմունքը, ներկայացվում են կենդանիների վաճառքի, բուծման, կենդանիների քնեցմանը ներկայացվող պահանջները, կացարաններում պահելու պայմանները եւ այլն:
Մերի Գալստյանն ասաց. «Ներմուծվել է շների նույնականացման՝ անձնագրեր ունենալու պահանջը, ինչը արդյունավետ է լինելու նրանց կորելու դեպքում տերերի նույնականացման հարցում, դա կարեւոր է լինելու նաեւ թափառող կենդանիների կարգավորման տեսանկյունից»:
Սերգեյ Բագրատյանը հարցրեց. «Վայոց ձորի մարզում արջը շատ ազատ է, ոչ շատ ուշ ժամերին, 11-12-ին իջնում է գյուղ, դպրոցի մոտ, ինչ ուզում՝ անում է ու գյուղացին պաշտպանված չի, որովհետեւ Կարմիր գրքում գրանցված կենդանի է: Ռիսկ կա, որ կհարձակվի ու հատկապես ծերերը հնարավորություն չեն ունենա փախչելու: Գյուղում անելանելի վիճակ է ստեղծվում, ի՞նչ անեն»:
Կարդացեք նաև
Մերի Գալստյանը պատասխանեց, որ այս օրենքը չի կարգավորում վայրի կենդանական աշխարհի հետ կապված որեւէ իրավահարաբերություն, այս օրենքը բացառապես տնային, թափառող կենդանիների, ծառայողական, սպորտային, ժամանցային ցուցադրության համար նախատեսված կենդանիներին է վերաբերում: Դա «Կենդանական աշխարհի մասին» օրենքի կարգավորման տիրույթում է:
Հիշեցնենք, որ նմանատիպ մի օրենք՝ կենդանիների նկատմամբ դաժան վերաբերմունքի մասին, հեղինակել էր ԲՀԿ պատգամավոր Նաիրա Զոհրաբյանը:
Այսօր «Լուսավոր Հայաստան» խմբակցությունից Սարիկ Մինասյանը բողոքեց՝ օրենքն ընդունելուց հետո թափառող շներին չեն կարողանում վերահսկել. «Թափառող շները ոհմակներով են արդեն շրջում, հարձակվում են երեխայի, ծերերի վրա: Դեպք եղավ՝ 2-3 տարեկան երեխային հոշոտեցին, հազիվ փրկվեց երեխան: Իմ համար ավելի կարեւոր է ՀՀ քաղաքացիների հոգեկան ու ֆիզիկական անվտանգությունը, քան, շատ կներեք, թափառող շների: Գուցե այլընտրանք է քնեցումը թափառող շների: Գյումրիում չեն կարող այնպիսի չափերի կացարան կառուցել, որ բոլոր թափառող շներին տեղավորեն: Ասենք, 5000 թափառող շուն կա, ինչքա՞ն գումար պետք է ներդրվի, որ կացարան կառուցվի, այդքան սնունդ, բուժում ապահովի,դա մեր երկրի բյուջեի համար այնքան հարմար չի»:
Մերի Գալստյանը պատասխանեց, որ բյուջեի հետ կապված հաշվարկներ եղել են, թե մեկ թափառող շուն կացարանում պահելը որքան է արժենալու. «Հարցերը փորձել ենք հավասարակշռության տրամաբանության հիման վրա կառուցենք: Պետք է ապահովվի թե՛ բնակչության անվտանգությունը, նաեւ կենդանիների պաշտպանությունը: Կենդանիների հետ մեր համակեցությունը պետք է լինի համերաշխ ու անվտանգ: Մենք ուսումնասիրել ենք միջազգային փորձը ու գիտենք, որ իրենք տարիներով են հասել նրան, ինչը հիմա օրինակելի է համարվում»:
Պատգամավորը հորդորեց այս նախագիծն այսօր քվեարկության չդնել, քանի որ կառավարության հետ դեռ աշխատում են նախագծի վրա: Քվեարկությունը կլինի ավելի ուշ:
Հռիփսիմե ՋԵԲԵՋՅԱՆ
