Մոսկվայում մեկնարկել են ՀՀ, ՌԴ և Ադրբեջանի արտգործնախարարների խորհրդակցությունները՝ մարդասիրական հրադադարի հաստատման շուրջ:
Վերլուծական շրջանակները քննարկում են, թե ինչ ակնկալիքներ կան զինադադարի շուրջ բանակցություններից, և որոնք են կողմերի համար ընդունելի սահմանագծերը: Քարնեգի հաստատության ավագ վերլուծաբան Թոմ դե Վաալի կարծիքով իրավիճակը շարունակում է մնալ խնդրահարույց: Ըստ նրա՝ հասկանալի են հայկական կողմի անվտանգության և զինադադարի անհրաժեշտության մտահոգությունները: Միևնույն ժամանակ, ըստ նրա, հասկանալի են նաև ադրբեջանական կողմի ստատուս-քվոյի բացառման և ավելի ակտիվ քաղաքական գործընթացի անհրաժեշտության շուրջ տեսակետները: Կողմերի հռետորաբանությունը կարևոր խոչընդոտ է: Նա չբացառեց նոր արյունալի բախումներ մոտ ամիսներին:
«Հասարակությունների միջև ատելությունը լուրջ խնդիր է: Առաջնորդներն իրական զինադադարին զուգահեռ պետք է իրենց խոսքը կառուցեն զինադադարի հռետորաբանության վրա: Միջազգային հանրությունը ևս այստեղ ունի դերակատարում: Այն պետք է հստակ շեշտի կողմերին, որ ատելության հռետորաբանությունն անընդունելի է, և կողմերը պետք է ցուցադրեն, որ ի վիճակի են ապրել խաղաղ կողք կողքի»,- ասել է դե Վաալը:
Միջազգային հարաբերությունների հաստատության տնօրեն, եվրոպացի վերլուծաբան Նաթալի Թոչին գտնում է, որ կարևոր է հասկանալ, թե ինչ պայմանների պարագայում Բաքուն կդադարեցնի ռազմական գործողությունները: Միևնույն ժամանակ կարևոր է, որ դա ճանապարհ հարթի դեպի առարկայական խաղաղ բանակցություններ այնպիսի պայմանավորվածությամբ, որն ընդունելի լինի հայկական կողմի համար: Դեռևս պարզ չէ, ըստ նրա, թե որտեղ է անցնում երկու կողմերի համար ընդունելի սահմանը: «Ռուսաստանը շարունակում է մնալ միակ կողմը, որն ունի ամենահստակ պատկերացումներն այս կապակցությամբ»,- եզրակացնում է վերլուծաբանը:
Կարդացեք նաև
Իր հերթին Քարնեգի հիմնադրամի մոսկովյան կենտրոնի տնօրեն Դմիտրի Տրենինը վստահ է, որ Մոսկվայի համար սահմանագիծն է ջիհադիստների ներկայության հարցը հակամարտության գոտում: Դա կարևոր շարժառիթ է Մոսկվայի համար՝ ձգտելու կրակի դադարեցմանը, ուստի ՌԴ ճնշում կգործադրի երկու կողմերի վրա կրակի դադարեցման հարցում, գտնում է փորձագետը: Դրա հետ մեկտեղ նա վստահ է՝ վերադարձը նախապատերազմական ստատուս-քվոյին ընդունելի չէ Ադրբեջանի համար: «Մի քանի դատարկ գյուղերի գրավումն այս վերջին հարձակման ընթացքում բավարար չէ հաղթանակ հռչակելու համար, ուստի անհրաժեշտ է որևէ այլ բան ևս»,- ասում է Տրենինը:
Հոդվածն ամբողջությամբ՝ այստեղ:
