Այսօր մի խումբ անկուսակցական քաղաքացիներ մտահոգություններով լի հերթական նամակը փոխանցեցին Հայաստանում ԱՄՆ դեսպան Լին Մ. Թրեյսիին։
Անձամբ դեսպանին հանդիպել չհաջողվեց, քանի որ դեսպանատան քաղաքականությունն է այդպիսին, նշել էր դեսպանատան ներկայացուցիչներից մեկը։
Ի վերջո, նախաձեռնության համակազմակերպիչներ Դավիթ Զաքարյանից և Նորայր Մանվելյանից նամակը ընդունեց դեսպանատան դիվանագիտական կորպուսի ներկայացուցիչներից մեկը։ Դավիթ Զաքարյանը նշեց, որ դեսպանատան դիվանագիտական կորպուսի աշխատակցին մանրամասն ներկայացրել են իրենց մտահոգությունները, ինչպես նաև ԱՄՆ վճռորոշ դերը ՀՀ-ում։
Իր հերթին դեսպանատան աշխատակիցը նշել էր, որ իրենք շատ են սիրում Հայաստանը, հայ ժողովրդին և մտահոգված ու ուշադիր հետևում են տեղի ունեցող իրադարձություններին։
Կարդացեք նաև
Նախաձեռնության անդամները անդրադարձան նաև 1992թ. ընդունված 907 բանաձևին, որը նախատեսում էր ԱՄՆ-ի կողմից աջակցության չտրամադրում Ադրբեջանին, քանի դեռ ԱՄՆ նախագահը չի համոզվել և զեկուցել Կոնգրեսին, որ պաշտոնական Բաքուն քայլեր է ձեռնարկում Հայաստանի ապաշրջափակման համար և ռազմական ուժ չի կիրառում Հայաստանի Հանրապետության և Լեռնային Ղարաբաղի դեմ։ Նախաձեռնության անդամները կարծում են, որ քանի որ հենց Ադրբեջանն է նախաձեռնել ռազմական ագրեսիան, ապա 907 բանաձևը պիտի ուժի մեջ մնա։
Նշենք, որ նախաձեռնությունը արդեն իսկ նամակներ է հանձնել Հայաստանում Իրանի Իսլամական Հանրապետության և Ֆրանսիայի դեսպաններին։ Հաջորդը ՌԴ դեսպանատունն է։
