Նիկոլ Փաշինյանի հրաժարականի պահանջով երեկվանից հացադուլ հայտարարած Գեղամ Մանուկյանին եւ Գարիկ Ավետիսյանին այսօր ժամը 10:00-ից միացել է նաեւ Սահմանադրական դատարանի նախկին անդամ, նախկին Գերագույն Խորհրդի իրավական հարցերի հանձնաժողովի նախագահ Կիմ Բալայանը: Սակայն նա Aravot.am-ին ասաց, որ իր պահանջը միանգամայն ուրիշ է:
«Իմ պահանջը զուտ իրավական է: Ես պահանջում եմ քրեական պատասխանատվության ենթարկել Նիկոլ Փաշինյանին՝ երկրի սահմանադրական կարգը տապալելու համար: Եվ որպեսզի մեր սովորական քաղաքացու համար ավելի հասկանալի լինի, բացատրեմ: Նա միջազգային պայմանագրեր կնքելու կարգը խախտել է: Սահմանադրությամբ նախատեսված է, թե միջազգային պայմանագրերը ինչպես պետք է կնքվեն: Պետք է քննարկում լիներ, պետք է փաստաթուղթը գնար Սահմանադրական դատարան, որտեղ պետք է գնահատվեր, որ այն համապատասխանում է սահմանադրությանը, որից հետո պետք է վավերացվեր Ազգային ժողովում ու միայն դրանից հետո ստորագրվեր»,-ասաց նա:
Հարցին՝ ասում են, թե սա հայտարարություն է, այլ ոչ թե պայմանագիր, Կիմ Բալայանը պատասխանեց. «Սահմանադրության մեջ հստակ նշված է՝ մարդու իրավունքներին վերաբերող բոլոր հարցերը եւ ռազմական բնույթի գործողությունները պարտադիր կարգով միջազգային պայմանագրով կարող են լուծվել: Դրանք այլ ձեւով չեն կարող լուծվել: Կարող եք բացել սահմանադրությունը եւ ծանոթանալ»:
Հետաքրքրվեցինք, թե ինքն է՞լ է անժամկետ հացադուլի նստում: «Ինչի՞ անժամկետ: Մինչեւ քրեական պատասխանատվության ենթարկվելը: Հուսով եմ, որ դա ավելի երկար չի տեւի, քան անժամկետը: Մնում է, որ գլխավոր դատախաղը եւ ՀՔԾ պետը անգործունեություն չցուցաբերեն՝ քրեական գործ հարուցեն եւ մեղադրանք առաջադրեն»,-պատասխանեց Կիմ Բալայանը:
Կարդացեք նաև
Աշոտ ՀԱԿՈԲՅԱՆ
