«Արցախի Հանրապետության պատմաճարտարապետական կարեւորագույն հուշարձաններից մեկի` Ամարասի վանական համալիրի շինարարությունը, վերականգնման աշխատանքները վերսկսում ենք»,- Aravot.am-ի հետ զրույցում հայտնեց Արցախի Հանրապետության կրթության, գիտության, մշակույթի եւ սպորտի նախարար Լուսինե Ղարախանյանը:
«Այդ աշխատանքները վերսկսվում են «Լույս» հիմնադրամի հովանավորությամբ: Դրանք ընդհատվել էին սեպտեմբերին` Ադրբեջանի եւ Թուրքիայի կողմից ծավալած պատերազմական գործողությունների պատճառով: Պատերազմի ավարտից հետո վանական համալիրի հետագա պահպանման նպատակով նպատակահարմար ենք գտել նորից դիմել «Լույս» հիմնադրամին` ավարտին հասցնելու համար վերականգնման աշխատանքները»,-հավելեց ԱՀ նախարարը:
Անդրադառնալով Ամարաս վանական համալիրին` անվտանգության տեսանկյունից, ինչի մասին բարձրաձայնել էր նաեւ Ամարասի վանահայր Հայր Գեղարդ աբեղա Հովհաննիսյանը, ԱՀ ԿԳՄՍ նախարարը նշեց. «Ամարասը որպես վանական համալիր այժմ ռուս խաղաղապահ ուժերի վերահսկողության ներքո է: Ճիշտ է, այն հիմա շատ մոտ է ադրբեջանական մարտական դիրքերին, սակայն կարծում եմ, որ համալիրին որեւէ վտանգ չի կարող սպառնալ:
Ես համոզված եմ, որ Ամարասի վանական համալիրն անվտանգ է լինելու, քանի որ ռուս խաղաղապահների վերահսկողության ներքո է: Արցախում ռուսական խաղաղապահ զորախմբի հրամանատար Ռուստամ Մուրադովը եւս հանրապետության նախագահի հետ այցելել է Ամարաս»:
Կարդացեք նաև
ԱՀ ԿԳՄՍ նախարարը ընդգծեց, որ փորձելու են ամեն կերպ ակտիվացնել Ամարասի վանական համալիրի կենսագործունեությունը, մշակութային -հոգեւոր կյանքը:
Գոհար ՀԱԿՈԲՅԱՆ
Նախարարի լուսանկարը` Ֆեյսբուքյան էջից
