Հնդկական հաց «Նաան» (տեսանյութ)

Հնդկական նաանը պատկանում է տափակ հացերի ընտանիքին, ինչպիսիք են մեր լավաշը, արաբական փիթան, մեքսիկական տորտիլյան, որոշ դեպքերում նաեւ՝ իտալական ֆոկաչան, ինչո՞ւ չէ, նաեւ՝ պիցցան, եւ այլն:

Նաանի հատկապես այս՝ կանաչիով եւ սխտորով տարբերակն է հայտնի: Այն շատ համեղ է, բուրավետ եւ կարելի է ուտել ոչ թե որպես ճաշի հետ մատուցվող հաց, այլ՝ լիարժեք ուտեստ:

Անհրաժեշտ մթերքները

Ալյուր- 500 գրամ

Չոր խմորիչ-1 ճաշի գդալ

Շաքարավազ-1 ճաշի գդալ

Աղ-1 լիքը թեյի գդալ

Կաթ-1 բաժակ

Մածուն-2 ճաշի գդալ

Բուսական յուղ-1 ճաշի գդալի չափ՝ անհրաժեշտության դեպքում

Ինչպես նաեւ՝ 50 գրամ կարագ, 1-2 պճեղ սխտոր եւ մի քանի ճյուղ համեմ

Պատրաստման եղանակը

Ալյուրը մաղել, լցնել խորը թասի մեջ, վրան լցնել աղը եւ խառնել: Գոլ, կամ առնվազն՝ սենյակային ջերմաստիճանի կաթի մեջ լուծել խմորիչը եւ շաքարավազը: Ալյուրի մեջ փոսիկ բացել, խմորիչով կաթը, ինչպես նաեւ մածունը լցնել մեջ, խառնել, ապա սկսել հունցել: Պետք է դառնա փափուկ, ձեռքերին չկպչող խմոր: Եթե շատ թույլ է, կարող եք մի փոքր էլ ալյուր ավելացնել, եթե շատ պինդ է՝ մի փոքր էլ կաթ ավելացրեք: Սակայն, եթե տեսնում եք, որ խմորը բավականաչափ պինդ է, բայց դեռ կպչում է ձեռքերին, ոչ թե ալյուր, այլ ձեթ քսեք ձեռքերին եւ այդպես հունցեք:

Թասից տեղափոխեք ալյուրոտ սեղանին կամ տախտակի վրա եւ շարունակեք մի քիչ էլ հունցել, որից հետո դրեք թասի մեջ, ծածկեք սրբիչով եւ դրեք մութ ու տաք տեղ՝ առնվազն 2 ժամով: Կարող եք նաեւ խմորը երեկոյան անել եւ դնել ոչ թե տաք տեղ, այլ՝ սառնարանի մեջ՝ մինչեւ առավոտ, եւ առավոտյան պատրաստել հացերը:

Երբ խմորը հասունացած լինի, բաժանեք հավկիթի մեծության գնդերի: Այսքան խմորից ստացվում է 14-16 հաց: Կարող եք խմորի մի մասը պատրաստել, մյուս մասը դնել սառնարան՝ ավելի ուշ պատրաստելու համար, անգամ կարող եք խմորը սառցախցիկում պահել՝ մինչեւ մեկ ամիս:

Գնդած խմորները թողեք եւս 15-20 րոպե հանգստանան: Հաստ հատակով, ցանկալի է՝ թուջե (չուգունից) թավան լավ տաքացրեք, ապա կրակը դարձրեք միջին: Խմորի գնդերը բացեք հնարավորինս տափակ, դրեք չոր թավայի վրա:

Մինչեւ խմորը եփվի, առանձին ամանի մեջ հալեցրեք կարագը, որի մեջ լցրեք մանր կտրատած սխտորն ու համեմը: Երկու կողմից եփված նաանը դրեք ափսեի վրա, վրան քսեք կանաչիով եւ սխտորով կարագը: Հաջորդ հացը թխեք, դրեք վրան, նորից պատեք կարագով:

Ի դեպ, եթե ունեք պատրաստի «զաթար» համեմունք, ապա կարող եք այս խմորով պատրաստել նաեւ արաբական զաթար հաց: 2 ճաշի գդալ ձիթապտղի յուղին խառնեք 1 ճաշի գդալ զաթար, եւ կանաչիով կարագի փոխարեն այդ խառնուրդը քսեք նաանի վրա:

Պատրաստման եղանակը եւ մանրամասները կարող եք տեսնել տեսանյութում.

Բարի ախորժակ:

Պատրաստեց Մելանյա ԲԱՐՍԵՂՅԱՆԸ