Այս աղանդերը կարելի է վայելել ե՛ւ որպես ինքնուրույն աղանդեր, ե՛ւ որպես տարբեր տորթերի կրեմ, ե՛ւ պարզապես հացին քսել եւ ուտել որպես նախաճաշ: Կիտրոնի զգլխիչ բույրը եւ թարմացնող համը գնահատողները հաստատ կհավանեն այս կրեմը:
Անհրաժեշտ մթերքները
Շաքարավազ – 1-1,5 բաժակ՝ ըստ ձեր քաղցրասիրության
Հավկիթ- 4 հատ (որոշ դեպքերում օգտագործում են միայն դեղնուցները, որոշ դեպքերում՝ 2 դեղնուց եւ 2 ամբողջական հավկիթ, ես օգտագործում եմ ամբողջականը եւ շատ լավ է ստացվում)
Կարդացեք նաև
Կիտրոն-3 հատ
Աղ- մի պտղունց
Կարագ-100-120 գրամ՝ սենյակային ջերմաստիճանի
Պատրաստման եղանակը
Կիտրոնները լավ լվացեք: Ամենամանր անցքերով քերիչով քերեք 1 կամ 2 կիտրոնի կեղեւը: Քամեք կիտրոնների հյութը: Հարկավոր է մոտ 1 բաժակ հյութ:
Լվացած հավկիթները կոտրեք կաթսայի մեջ, ավելացրեք շաքարավազը, աղը եւ լավ հարեք:
Ավելացրեք նաեւ կիտրոնի հյութը, խառնեք եւ դրեք շատ մարմանդ կրակին:
Անընդհատ խառնելով եփեք 2-3 րոպե, ավելացրեք նաեւ կիտրոնի կեղեւը, շարունակեք եփել՝ անդադար խառնելով փայտե կամ սիլիկոնե գդալով: 
Հենց պնդանա, գդալ-գդալ ավելացրեք կարագը:
Երբ կարագն ամբողջությամբ հալվի, կրեմն էլ սկսի կպչել փայտե գդալին, անջատեք, թողեք մի փոքր գոլանա, լցրեք ապակյա տարաների մեջ:
Երբ ամբողջությամբ սառչի, դրեք սառնարան: Սառնարանում կարող եք պահել 7-10 օր:
Պատրաստման նրբությունները եւ մանրամասները՝ տեսանյութում.
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
