ՀՀ պետական միջոցառումների նախապատրաստման եւ կազմակերպման հանձնաժողովը գլխավորում է ՀՀ վարչապետի գլխավոր խորհրդական Արայիկ Հարությունյանը: Նա «Արմենպրեսի» մամուլի սրահում կայացած ասուլիսում տեղեկացրեց, թե հիշատակի ինչ միջոցառումներ են նախատեսված ապրիլի 23-24-ի առիթով: Հայտնեց, որ ապրիլի 23-ին ժամը 23-ին Ծիծեռնակաբերդի Հայոց ցեղասպանության հուշահամալիրում կկատարվի Վերդիի «Ռեքվիեմը», եւ հանդես կգան Հայաստանի ազգային ֆիլհարմոնիկ նվագախումբն ու Հայաստանի պետական ակադեմիական երգչախումբը, իսկ համերգը կղեկավարի Էդուարդ Թոփչյանը: Միջոցառումը ուղիղ կհեռարձակվի:
Արայիկ Հարությունյան
Ինչպես նշեց Արայիկ Հարությունյանը, ապրիլի 24-ին, լույս 23-ի գիշերը ժամը 24-ին Կոմիտասի անվան կամերային երաժշտության տանը Հայաստանի պետական կամերային երգչախումբը եւ «Հովեր» պետական կամերային երգչախումբը կներկայացնեն Մոցարտի «Ռեքվիեմը», համերգն էլ կղեկավարի գերմանաբնակ դիրիժոր Ալեքսանդր Իրադյանը:
Արայիկ Հարությունյանը հայտնեց, որ ապրիլի 24-ին, ժամը 19:15-ին Կարեն Դեմիրճյան մարզահամերգային համալիրում Տիգրան Մանսուրյանի Ռեքվիեմով հանդես կգան Հայաստանի ազգային սիմֆոնիկ նվագախումբը, Հայաստանի պետական կամերային երգչախումբը, այս համերգն էլ կղեկավարի Ռոբերտ Մլքեյանը:
«Այս միջոցառմանը նախատեսվում է դիվանագիտական պատվիրակությունների մասնակցությունը: Համերգը կլինի վարչապետ Նիկոլ Փաշինյանի հովանու ներքո»,-ասաց վարչապետի խորհրդականը:
Կարդացեք նաև
Հավելեց, որ նախատեսվում են մի շարք այլ միջոցառումներ եւս, այդ թվում՝ ցուցահանդես Հայոց ցեղասպանության թանգարան-ինստիտուտում՝ «Հայոց ցեղասպանությունը վերապրածների ընտանիքների հետքերով» խորագրով:
Նա տեղեկացրեց, որ ապրիլի 24-ին փակ կլինեն մի շարք ճանապարհներ՝ մասնավորապես Հաղթանակի կամրջից մինչև Լենինգրադյան փողոց ընկած հատվածը եւ այլ փողոցներ: Ապրիլի 24-ին առավոտյան 9-10-ը մուտքը դեպի Ծիծեռնակաբերդ եւս ժամանակավորապես կսահմանափակվի՝ պաշտոնական պատվիրակությունների այցելությունների պատճառով:
Մարթա Այվազյան
ՀՀ ԱԳ նախարարի խորհրդական Մարթա Այվազյանը նշեց, որ ԱԳՆ-ին կից գործող Մշակութային դիվանագիտության հարթակի կողմից կազմակերպվելու է ցուցահանդես, որը նվիրված է լինելու Արցախում մեր մշակութային եւ կրոնական հուշակոթողների եւ այլ արվեստի գործերի պահպանման խնդրին, ցուցահանդեսը կրելու է «Վտանգված ժառանգություն» խորագիրը, ընթանալու է Երեւանի քաղաքապետարանի ճեմասրահում, մուտքը բաց է լինելու հանրության համար՝ Երեւանի պատմության թանգարանի կողմից:
Նա նշեց, որ կցուցադրվեն 100-ից ավելի լուսանկարներ, ձեռագործ կոթողներ, գրքեր, գորգեր, կարպետներ: «Այս պահին ունենք տասից ավելի երկրներից պատվիրակություններ՝ ներառյալ Ֆրանսիան, Ռուսաստանը, սակայն ես չէի ուզենա կոնկրետ երկրների անուններ տալ, որովհետեւ գործընթացը դեռ ավարտված չէ, կան պատվիրակություններ նաեւ ԱՄՆ-ից, Եվրոպայից եւ արեւելյան երկրներից»,-ասաց նա:
Ռոմելա Աբովյան
ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելա Աբովյանը հիշեցրեց, որ Հայաստանի Հանրապետությունում կորոնավիրուսային հիվանդության առումով դեռեւս լարված իրավիճակ է, եւ օրական 800-1000 նոր դեպք է արձանագրվում, ինչը ծանրաբեռնում է առողջապահական համակարգը, առկա է նաեւ մահաբերության ցուցանիշի աճ: Նա ասաց, որ առողջապահության նախարարությունը հորդորում է փակ տարածքներում պահպանել նախարարի հրամաններով սահմանված բոլոր կանոնները, հնարավորինս չստեղծել կուտակումներ, բաց եւ փակ տարածքներում կրել դիմակներ, պահպանել սոցիալական հեռավորություն:
Գոհար ՀԱԿՈԲՅԱՆ
