«Հայրենիքի փրկության շարժումը» խորհրդի նիստ էր հրավիրել, որի ավարտից հետո շարժման վարչապետի թեկնածու Վազգեն Մանուկյանը լրագրողների հետ զրույցում ասաց, որ զարմանալի է, որ հայկական բանակը Սյունիքում միանգամից պատասխան չի տվել:
«Ցանկացած երկրի սահմանները, որ խախտվում են զինվորականները կրակելով և պաշտպանելով են պահում: Այն, որ իշխանությունը տկար է, տգետ է, դավաճան է, շատ է ասվել, բայց ես զարմանում եմ զինվորականների վրա: Իրենց համար կարգադրություն կատարել-չկատարելը դառնում է ավելի կարևոր, քան իրենց առաջին պարտականությունը՝ հայրենիքի պաշտպանությունը: Մենք քննարկում էինք հայրենիքի պաշտպանության համար ժամանակին, երբ որ մենք Ղարաբաղ կոմիտեում էինք մենք ջոկատներ էինք ստեղծում, և երևի իսկապես այդ ջոկատները պետք են: Մենք ունենք պետություն, մենք ունենք բանակ, որը լավ զինված է, միլիարդներ են ծախսվել այդ բանակի վրա, և այդ բանակը դատապարտված է անգործության: Եղան բազմաթիվ առաջարկություններն և՛ կազմակերպչական, և՛ քաղաքական, որոնք դեռ կքննարկվեն, միս ու արյուն կստանան: Որոշվեց, որ հայտարարություն պետք է գրել՝ մեր մտահոգությունների մասին: Մյուս կողմերից արդեն հասկանալի է՝ անկախ նրանից ընտրություններ կան, թե ընտրություններ չկան, ամեն օրը, որ այս իշխանությունը մնում է պետության գլխին վտանգավոր է Հայաստանի համար, և անպայման պետք է այս իշխանությունը փոխել»,- նշեց նա:
Անդրադառնալով այն հանգամանքին, որ Հայաստանը դիմել է ՀԱՊԿ-ին, Վազգեն Մանուկյանը ասաց. «Եթե դու քո երկիրը չես պաշտպանում, քեզ ոչ մեկը չի պաշտպանի: Դու պիտի պաշտպանես երկիրը, որ նոր իրավիճակ ստեղծվի, և գան քեզ օգնելու: 200 հոգի գալիս են, դու նահանջում ես ու հպարտանում ես, որ ես զոհ չեմ տվել: Այսօր չես տվել մինչև Երևան նահանջի թո՛ղ ադրբեջանցիները գան Երևան՝ առանց զոհերի գան Երևան: Դա պետություն չի արդեն: Դրա համար ես համարում եմ, որ պետք է դիմենք միջազգային կազմակերպություններին, լավ կլինի՝ ՄԱԿ-ի անվտանգության խորհրդին, բայց հույսը պետք է կապենք միայն մեր հետ: Մենք ունենք պատրաստի կառույցներ, որոնք տասնյակ տարիներ ծառայել են Հայաստանի համար և հիմա ոչ մի օգուտ չկա այդ կառույցներից»:
Նա համարում է, որ ռազմական դրությունը արդարացված կլինի, եթե բանակը կանգնեցնեն սահմաններին, ադրբեջանցիներին դուրս շպրտեն. «Բայց եթե ռազմական դրություն հայտարարվելու է և որևիցե բան չի արվելու, այդ դեպքում ինչո՞ւ է ռազմական դրություն հայտարարվում»:
Կարդացեք նաև
Իսկ տարածք՝ տարածքի դիմաց տարբերակը Վազգեն Մանուկյանը բացառում է. «Մենք ունենք մեր սահմանները, և այդ սահմանները անսասան պետք է լինեն՝ ոչ մի «տարածք՝ տարածքի դիմաց»: Մենք մի տարածքը մյուս տարածքի հետ փոխե՞նք: Աննորմալություն է»:
Ամի ՉԻՉԱԿՅԱՆ
