Կապան համայնքի ղեկավար Գեւորգ Փարսյանը օգոստոսի 2-ին համայնքի ավագանու արտահերթ նիստ էր հրավիրել։ Օրակարգում 18 հարց էր, սակայն նիստը քվորում չլինելու պատճառով չկայացավ։ Ավագանու 15 անդամից նիստին ներկայացել էր միայն մեկ հոգի՝ Նարեկ Դավթյանը։
2018թ–ի հոկտեմբերից մինչեւ օրս, թերեւս սա միակ դեպքն է, երբ համայնքի ղեկավարի կողմից նախաձեռնած ավագանու արտահերթ նիստում քվորում չի ապահովվում։ Ավագանու բացակա անդամներից մեկը Aravot.am-ի հետ հեռախոսազրույցում նշեց, որ հիվանդ է, մյուսը՝ մայրաքաղաքում է, ոմանք էլ հրաժարվեցին պատասխանել, թե ինչո՞ւ չեն ներկայացել արտահերթ նիստին։ Ըստ շրջանառվող լուրերի, Կապանի ավագանու անդամների մի մասը համաձայն չէ համայնքի ղեկավարի վարած քաղաքականության հետ։
Կապան համայնքի ղեկավար Գեւորգ Փարսյանից նույնպես չհաջողվեց պարզաբանումներ ստանալ։ Նա այդպես էլ չպատասխանեց մեր հեռախոսազանգերին, իսկ համայնքապետարանի գործավարը տեղեկացրեց, որ «պարոն Փարսյանը զբաղված է, խորհուրդ տալով կապվել մամուլի քարտուղարի հետ»։
Մամուլի քարտուղար Հասմիկ Հարությունյանն էլ հաստատեց, որ Գեւորգ Փարսյանը զբաղված է, բայց խոստացավ՝ «եթե ստացվի հանդիպել համայնքի ղեկավարին» ու ներկայացնել մեզ հետաքրքրող հարցերը։
Կարդացեք նաև
Արդյո՞ք ճգնաժամ է հասունացել Կապանի համայնքապետարանում եւ համայնքի ղեկավարը չի կարողանում վերահսկել իրավիճակը․ այս հարցերի պատասխաններն էինք ակնկալում ստանալ Գեւորգ Փարսյանից։ Aravot.am-ը պատրաստ է ներկայացնել նաեւ վերջինիս պարզաբանումները։
Արմեն ԴԱՎԹՅԱՆ
