ԱԺ մարդու իրավունքների պաշտպանության եւ հանրային հարցերի մշտական հանձնաժողովն այսօր հրատապ քննարկում է հրավիրել՝ Հայաստանում ստեղծված իրավիճակի վերաբերյալ:
Հիշեցնենք, երեկ երեկոյան, ՀՀ անվտանգության խորհրդի քարտուղար Արմեն Գրիգորյանը տեղեկացրեց, որ Գորիս-Կապան ճանապարհին Ադրբեջանը մաքսակետեր է տեղադրելու:
Հանձնաժողովի նախագահ Թագուհի Թովմասյանը տեղեկացրեց, որ քննարկմանը մասնակցելու համար հրավեր է ուղարկվել նաեւ կառավարության ղեկավար Նիկոլ Փաշինյանին: Քննարկման մեկնարկին կառավարության որեւէ ներկայացուցիչ ներկա չէր: Քննարկմանը չէին մասնակցում նաեւ իշխող «Քաղաքացիական պայմանագիր» խմբակցության ներկայացուցիչները:
Թագուհի Թովմասյանն ընթերցեց հինգ պահանջ, որոնք ուղղված էին կառավարությանը, մասնավորաբար, Նիկոլ Փաշինյանին.
Կարդացեք նաև
1.Ինչի՞ հիման վրա եք հայտարարել, որ ադրբեջանական հենակետը չի գտնվում ՀՀ տարածքում: Արդյոք արդեն իրականացվե՞լ է դեմարկացիա եւ դեմիլիտացիա: Դրա հիման վրա դուք միայն կարող էիք նման հայտարարությամբ հանդես գալ:
2.Ի՞նչ իրավական հիմքով է հայտարարվում, որ այդ մաքսակետը ՀՀ տարածքից դուրս է, ո՞ր քարտեզի հիման վրա:
3.Պետական սահմանի փոփոխություններ երբ իրականացվում են, իրականացվում են ՀՀ պետական սահմանի մասին օրենքի փոփոխությամբ: Մենք, օրենքով որեւէ փոփոխություն չենք իրականացրել, հետեւաբար, սա իրավական տեսանկյունից, խնդրահարույց իրավիճակ է:
4.Ինչպե՞ս է իրականացվելու ադրբեջանական մաքսային վերահսկողության ներքո մարդկանց եւ ապրանքների ազատ տեղաշարժը:
5.Ի՞նչ խնդիրներ կարող են առաջանալ Գորիս-Կապան ավտոճանապարհով մեր քաղաքացիների երթեւեկության համար, ինչպե՞ս ենք պաշտպանելու մեր քաղաքացիների կյանքի, ազատ տեղաշարժի եւ հիմնարար այլ իրավունքներ:
Թագուհի Թովմասյանը նաեւ դատապարտեց այսօր կառավարության շենքի մոտ ինքնաբուխ ցույցի հավաքված քաղաքացիներին բերման ենթարկելը՝ նկատելով, որ ոստիկանները ոչ իրավաչափ ուժ էին կիրառում, ինչը ժողովրդավարությունից հետընթաց է:
Նելլի ԳՐԻԳՈՐՅԱՆ
