ՖԿՍՊԻ ուսանողների հետ հանդիպման ժամանակ պրոֆեսիոնալ բռնցքամարտիկ Վախթանգ Դարչինյանը ասաց. «Հաճախ են ինձ մոտենում եւ հարցնում, թե ինչ մարզաձեւով զբաղվեն: Ես երբեք միանգամից բռնցքամարտի անունը չեմ տալիս: Խորհուրդ եմ տալիս զբաղվել մի քանի մարզաձեւերով, որպեսզի մարդը կարողանա գտնել իր հոգեհարազատ մարզաձեւը, ինչպես եղել է ինձ հետ: Գիտեք, որ մանուկ հասակում միանգամից զբաղվել եմ ըմբշամարտով ու բռնցքամարտով եւ հասկացել, որ իմը բռնցքամարտն է:
Լողի, շախմատի գնացեք: Եթե շախմատի ես գնում, պետք է նաեւ ֆիզիկականդ տեղը լինի, որպեսզի լավ մտածես, հանգիստ լինես: Ես շախմատ լավ եմ խաղում եւ շախմատը կապել եմ բռնցքամարտի հետ: Ինչպե՞ս: Շախմատում չես կարող չէ՞ ուղիղ, մի ուղղությամբ գնալ ու մրցակցիդ մատ հայտարարել: Պետք է կարողանաս խաբել. ուժը մի կողմից ցույց տալ ու մյուս կողմից հաղթել: Նույնը բռնցքամարտի մեջ է: Ես կարող է հարվածեմ գոտկատեղին, դեմքին, սակայն մեկ այլ հարվածով նոկաուտ անեմ:
Ես ձախլիկ եմ, հիմնական հարվածային ձեռքս ձախն է: Ու մեկ անգամ չի եղել, որ մրցակիցներս կարծել են՝ եթե ձախս փակեն, ոչինչ չեմ կարողանա անել: Բայց ճակատագրական սխալ են գործել, նոկաուտի են ենթարկվել իմ աջ ձեռքի հարվածից»:
Աշոտ ՀԱԿՈԲՅԱՆ
