Հայաստանի պետական կամերային նվագախմբի հերթական գեղեցիկ համերգը նվիրված էր կոմպոզիտոր, ալտահար, ՀՀ արվեստի վաստակավոր գործիչ , պետական մրցանակի դափնեկիր Ռուբեն Ալթունյանի հիշատակին:
Համերգից առաջ ներկայացվեց Ռուբեն Ալթունյանի դերակատարությունը՝ իբրեւ կոմպոզիտոր եւ մշակութային գործիչ, թողած ժառանգությունը: Նշվեց, որ նա Հայաստանից զատ նաեւ Հավանայում է մասնակցել երաժշտական, կրթական գործընթացին, ստեղծել է ուսումնական ծրագրեր՝ ալտի եւ կամերային անսամբլի մասնագիտությունների գծով, հեղինակել՝ ալտի երկմաս դասագիրք կուբացիների համար:
«Ռուբեն Ալթունյանին կարելի է երկար հիշել իր ապրած օրերի բոլոր գույներով, բոլոր լռություններով, որ նա գիտեր մշտապես տանել, նաեւ իր ուրախություններով, որ գիտեր վարակվել եւ վարակել»,-ասաց կոմպոզիտոր Տիգրան Մանսուրյանը: Նա ինքնին անսպասելի որակեց երեկոյի գոյությունը. «Որովհետեւ, երբ Ռուբենը մեզ հետ էր, որեւէ մեկի մտքով չէր անցնում հրաժեշտի խոսքեր ասել»:
Կարդացեք նաև
Կոմպոզիտորը նշեց, որ երկար ճանապարհ է անցել Ալթունյանի հետ՝ սկսած ուսանողական տարիներից, հետո նաեւ մտերմություն է արել Ալթունյան ընտանիքի հետ. «1960 թվականին, երբ ընդունվեցի Կոմիտասի անվան պետական կոնսերվատորիա, իմ ղեկավարը եղավ շատ սիրելի Ղազարոս Սարյանը: Իսկ հաջորդ տարին, երբ երկրորդ կուրս էի, եկավ Ռուբեն Ալթունյանը: Մենք դասարանական աշխատանքներից սկսած՝ բոլոր մանրամասներով ընկերություն ենք արել:
Ինքը մի մեծ առավելություն ուներ՝ ալտահար էր եւ իր արժանի տեղն ուներ իր կվարտետում, ուներ կվարտետի իր ընկերները: Նրանք հետաքրքիր գործունեություն էին ծավալում, որին ես իբրեւ ունկնդիր էի մասնակցում էի: Այդ տարիներին Ռուբենը գրեց իր ամենագեղեցիկ գործերից մեկը՝ Առաջին կվարտետը, որն այնքան մեծ թռիչք էր ուսանող հեղինակի համար: Ես այդ կվարտետի տպավորության տակ եմ առ այսօր»:
Տիգրան Մանսուրյանի խոսքով, Ռուբեն Ալթունյանի կերպարը նվիրյալի կերպար էր՝ իբրեւ դասախոս, երաժշտական կյանքի կազմակերպող անձնավորություն եւ իբրեւ հեղինակ:
Նշենք, որ Հայաստանի պետական կամերային նվագախումբը (գեղարվեստական ղեկավար եւ գլխավոր դիրիժոր՝ Վահան Մարտիրոսյան) ղեկավարեց դիրիժոր, միջազգային մրցույթների դափնեկիր Հարություն Արզումանյանը: Մենակատարը տաղանդավոր քանոնահարուհի Մարիաննա Գևորգյանն էր: Նա վերջերս Գրան պրի է շահել World folk vision հեղինակավոր մրցույթում՝ լինելով 115 երկրների 3950 մասնակիցների թվում:
Համերգին հնչեցին Ռուբեն Ալթունյանի ու Խաչատուր Ավետիսյանի ընտրված գործերից: Համերգը եզրափակվեց կամերային Ռուբեն Ալթունյանի՝ նվագախմբի համար գրված «Խաչատրիանա» ստեղծագործությամբ, որը կատարվել է աշխարհի շատ երկրներում: Համերգին, որին փառահեղ հանդես եկան՝ եւ նվագախումբը, եւ մենակատաը, ներկա էր նաև Ալթունյանի ընտանիքը: Կոմպոզիտորի դուստրը հուզված ասաց, որ եթե հնչում են հոր ստեղծագործությունները, ուրեմն նա դեռ ողջ է եւ դահլիճում է:
Գոհար ՀԱԿՈԲՅԱՆ
