Հայաստանին անվտանգությունից, ջրային-էներգետիկ ռեսուրսներից զրկելու նպատակով Ադրբեջանը մեկ տարուց ավելի՝ իրականացնում է նպատակաուղղված քաղաքականություն՝ աստիճանաբար ներխուժումներ իրականացնելով, հավակնություններ ունենալով ընդհուպ մինչեւ Երեւան, վերահսկելով միջպետական ճանապարհները։ Այս մասին այսօր «Միջազգային եւ անվտանգության հարցերի հայկական ինստիտուտի» հեղինակած՝ 2020թ․-ի նոյեմբերի 9-ի եռակողմ հայտարարության ստորագրումից հետո ՀՀ-ի եւ Արցախի դեմ Ադրբեջանի իրականացրած սադրանքների մասին զեկույցի ներկայացման ժամանակ հայտարարեց միջազգային հարաբերությունների եւ անվտանգության փորձագետ Սոսի Թաթիկյանը։
Նրա խոսքով՝ Ադրբեջանը մեզ շարունակաբար ռազմաքաղաքական տեռորի է ենթարկում, Արցախում վարում էթնիկ բնաջնջման քաղաքականություն, իսկ ռուս խաղաղապահները չունեն իրավական մանդատ, ուստի լարվածության գոտում միջազգային խաղաղապահներ տեղակայելը վարչապետից հնչած ճիշտ առաջարկ է․ «Աշխարհաքաղաքական ներկայիս իրավիճակում արցախահայությունը մնացել է պատանդի կարգավիճակում։ Ռուս խաղաղապահները նրանց անվտանգության միակ երաշխավորն են, միաժամանակ՝ կան կասկածներ, թե ինչու իրենց պատասխանատվության գոտում Ադրբեջանը կարողացավ երկու գյուղ հայաթափել։ Ակնհայտ է, որ Ադրբեջանին Արցախը պետք է առանց հայերի եւ այդ ուղղությամբ ամեն ինչ անում են։ Լուծումը ՄԱԿ-ի մանդատի ներքո բազմազգ խաղաղապահ առաքելություն ունենալն է»։
Կարդացեք նաև
Սոսի Թաթիկյանը նաեւ նշեց, որ Ադրբեջանի պատկերացրած խաղաղության օրակարգն անկեղծ չէ։
Լուիզա ՍՈՒՔԻԱՍՅԱՆ