Aravot.am-ի տեղեկություններով, օրերս պարեկային ծառայության աշխատակիցների կողմից, ի թիվս այլ քաղաքացիների, տուգանվել է նաեւ Լոռու մարզպետ Արամ Խաչատրյանի հայրը: Լուրի իսկությունը փորձեցինք ճշտել մարզի ղեկավարից, վերջինս սակայն հերքեց այն՝ նշելով, որ ինքն այդ մասին տեղյակ չէ. «Ես, ճիշտն ասած, իմ հայրիկի հետ երեւի մի շաբաթ առաջ եմ խոսել: Հիմա ինձ մի բան եք հարցնում, որից ես այս պահին տեղյակ չեմ, կարող եմ ճշտել, բայց չեմ լսել ես նման բան»,- ասաց Արամ Խաչատրյանն ու շարունակեց. «Կապ չունի մարզպետ է, մարզպետի հայրիկ է, եղբայրն է, օրենքը բոլորի համար է: Եթե խախտում են անում՝ բոլորիս է վերաբերվում: Եթե կա խախտում, օրենքով սահմանված կարգով պետք է ակտավորվի կամ միգուցե նախազգուշացում լինի»:
Երեկ այս մասին իր ֆեյսբուքյան էջում գրել էր նաեւ «Իրազեկ քաղաքացիների միավորում» հասարակական կազմակերպության համակարգող Դանիել Իոաննիսյանը, նշելով, մի քանի անձանց, որոնց նկատմամբ մեկ շաբաթվա ընթացքում տուգանք է սահմանել Պարեկային ծառայությունը: Նրանց թվում է եղել ոչ միայն Լոռու մարզպետի հայրը, այլեւ՝ Սպիտակի ներկայիս քաղաքապետը, Վանաձորի նախկին քաղաքապետը, Վանաձորի ամենահայտնի քրեական հեղինակության որդին։
Տաթեւիկ ՂԱԶԱՐՅԱՆ
