44- օրյա պատերազմի հենց առաջին օրը Ջրականում (Ջաբրայիլ) զոհված ժամկետային զինծառայող Նորայր Սողոմոնյանի մայը՝ Սյուզան Վարդանյանը, որդու մահվան հանգամանքների բացահայտման սեփական հետաքննությունն է սկսել: Նրա խոսքով՝ բացահայտել է կարեւոր փաստեր՝ հրամանատարական կազմի փախուստից մինչեւ հզոր զենքի չկրակելու դեպքեր, ու այդ բոլոր փաստերը փոխանցել է Քննչական կոմիտե՝ քրեական գործ սկսելու պահանջով: Սյուզան Վարդանյանի բացահայտումների հետքերով քրեական գործ չի հարուցվել, միայն օրեր առաջ հրավիրվել է հարցաքննության:
«Որդիս զոհվել է պատերազմի հենց առաջին օրը՝ մնալով առաջնագծում շրջափակման մեջ: Դիրքերում հզոր զինատեսակ է եղել, որը հիմնականում կիրառվել է մարդուժի դեմ, ու հիմնական ճեղքը եղել է որդուս՝ N մարտական դիրքից, արդյունքում երեք դիրքի տղաներ մնացել են շրջափակման մեջ ու զոհվել, բայց զենքը չի օգտագործվել: Հարցը մի քանի տասնյակ 20 տարեկան տղաների մասին է: Ո՞վ պետք է պատասխան տա, ինչո՞ւ զոհվեցին, ինչո՞ւ այդ զենքը, որը թուրքերի ահ ու սարսափն է եղել, չի կրակել: Պաշտոնական տվյալներով՝ 07:20 պատերազմը սկսել է, անմիջապես հետո երեւի մոտ 08:00-ին ադրբեջանական կողմից տանկերը եկել եւ դիրքավորված են եղել կոնկրետ հրամանատարական ՀԴԿ-ոմ, այս ամենը փաստում է, որ հրամանատարներն արդեն այնտեղ չեն եղել: Տղայիս դիրքի անմիջապես ներքեւի դիրքում է եղել հրամանատարական ՀԴԿ-ն, որը կոչվել է X: Մեր հավաստի տեղեկություններով՝ հրամանատարական կազմը պատերազմի սկսելուն պես լքել, փախել է դիրքերից: Այսօր մեր տղաները չկան, մեզ հետ չեն ու իրենց անփութության պատճառով մեզ հետ չեն: Ո՞վ պետք է պատասխան տա: Հրամանատարներից մեկին Հադրութում անձամբ եմ հանդիպել, նա այսօր Եղեգնաձորի զորամասում ավելի բարձր պաշտոն է զբաղեցնում: Իրենք գիտակցաբար լքել են դիրքերը, մեր տղաներին թողել անօգնական»,- ահազանգում է որդեկորույս Սյուզան Վարդանյանը:
Նորայր Սողոմոնյանը մեկ տարի անհետ կորած է համարվել , երկու ամիս առաջ են գտել նրա դին, այդ ընթացքում, մոր պատմելով՝ ինն անգամ դիրքեր են գնացել որոնողական աշխատանքների. «Եղբայրս, որը մասնակցում էր որոնողական աշխատանքներին, հայտնաբերել է չկիրառված զենքը: Խոսել ենք զենքի պատասխանատուի հետ, սկզբում ոչինչ չէր պատմում, ասում էր՝ չի հիշում, կանտուզիա է տարել, բայց երբ շատ պնդեցինք, հիշողությունը վերականգնվեց: Ասաց՝ փախել ենք, չենք կրակել: Արդյունքում, երկու-երեք մարտական դիրքերի տասնյակ տղաները զոհվեցին»:
Սյուզան Վարդանյանը պնդում է, որ ձեռքի տակ շատ փաստեր ունի, սպասում է՝ քրեական գործի հարուցմանը, որ միջնորդությունների ձեւով ներկայացնի: Նա պահանջում է պատժել որդու ու տասնյակ զինվորների զոհվելու համար մեղավորներին:
Կարդացեք նաև
Նորայր Սողոմոնյանը հուլիսի 1-ին կդառնար 22 տարեկան: Ավարտել էր Վայոց ձորի գեղարվեստի դպրոցը, ընդունվել Խ. Աբովյանի անվան մանկավարժական համալսարանի գեղանկարչության բաժին ու զորակոչվել բանակ: Նորայրի բացակայությամբ ծննդավայրում ծննդյան օրը կցուցադրվեն նրա աշխատանքները՝ մոտ 100 կտավ:
Արփինե ՍԻՄՈՆՅԱՆ
