Այսօր ծանրամարտիկ, բազկամարտի աշխարհի չեմպիոն, համաշխարհային ռեկորդակիր, միջազգային կարգի սպորտի վարպետ, ՀՀ ԱԻՆ Վանաձորի թիվ 2 ՀՓՋ փրկարար Զորիկ Պողոսյանը սահմանեց «Գինեսի» նոր ռեկորդ։
Չեմպիոնն այս անգամ իր ռեկորդը նվիրեց Ղարաքիլիսայի ճակատամարտին։ Իր իսկ կողմից սահմանված վերջին ռեկորդը գերազանցելով, դժվարացրեց իր առջեւ դրված խնդիրը։ Բարձրացնելով 175 կգ ծանրաձողը՝ ուսերին դրած 1 մ 90 սմ կքանստած քայլեց, ապա շրջադարձ կատարեց եւ կանգնեց. «Մարդու հնարավորությունների անսահմանությունը, որ գերազանցում է, դա ինձ համար ռեկորդների ռեկորդ է: Նա ինչ-որ մեկի ռեկորդը չգերազանցեց, առայժմ ինքն իր հետ է կռիվ անում: Իր կռիվը ծանրաձողի հետ է, ոչ մեկի հետ չի: Եվ ամեն անգամ ինքը զարմացնում է տարբեր վարժություններ կատարելով, տարբեր ծանրություններ բարձրացնելով»,- ասում է Հայաստանի «Դյուցազնագրքի» ասոցիացիայի ղեկավար Վարդան Թովմասյանը:
400-ից ավելի հայ դյուցազուններն, ընդհանուր առմամբ, սահմանել են 1002 ռեկորդ, Զորիկի այս ռեկորդը 1003-րդն է. «Շատ վտանգավոր վարժություն է, բայց ինձ մոտ իմ կամային հատկանիշների եւ կամքի ուժի շնորհիվ ստացվեց, եւ սահմանեցի «Գինեսի» ռեկորդ»,- ասում է Զորիկն ու շարունակում. «Մարդն իր հոգեբանությամբ առաջին հերթին պետք է լինի փրկարար: Փրկարարի գործում եւս ֆիզիկական աշխատանքը շատ կարեւոր է: Իմ այս ռեկորդները նույնպես նպաստում են փրկարարի աշխատանքին»:
Կարդացեք նաև
Զորիկ Պողոսյանը նախորդ ռեկորդը նվիրել էր քառօրյա ու 44-օրյա պատերազմի հերոսներին, իսկ այս՝ 5-րդ համաշխարհային ռեկորդը նվիրեց Ղարաքիլիսայի ճակատամարտին:
Տաթեւիկ ՂԱԶԱՐՅԱՆ
