2022 թվականի հունվարի 21-ին վարչական դատարանում (դատավոր՝ Հրաչ Այվազյան) լսվել էր Վահե Ղուկասյանի հայցադիմումն ընդդեմ «Արթիկ» քրեակատարողական հիմնարկի՝ «Արթիկ» քրեակատարողական հիմնարկի պետի 16.11.2018 թվականի «Համաներում կիրառելու մասին» որոշումն անվավեր ճանաչելու, բարենպաստ վարչական ակտ կայացնելուն, այն է՝ 01.11.2018 թվականին ընդունված «Էրեբունի-Երեւանի հիմնադրման 2800-ամյակի եւ Հայաստանի 1-ին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 7-րդ մասի 4-րդ կետը կիրառելուն պարտավորեցնելու պահանջների մասին գործը:
Դատապարտյալ հայցվորը միջնորդել էր բաց թողնված ժամկետը համարել հարգելի՝ պատճառաբանելով, որ «Արթիկ» քրեակատարողական հիմնարկի պետի 16.11.2018 թվականի որոշումը վիճարկել է քրեական գործեր քննող դատարանների միջոցով, սակայն ՀՀ վճռաբեկ դատարանը 24.12.2021 թվականի որոշմամբ իրավական դիրքորոշում է հայտնել, որ նման հարցերի քննությունն ընդդատյա է ՀՀ վարչական դատարանին: Դատարանը գտել էր, որ այն ենթակա է բավարարման:
Դատարանը նկատի ունենալով, որ ՀՀ վճռաբեկ դատարանի 24.12.2021 թվականի որոշմամբ թիվ ՇԴ/0035/15/18 գործով դատապարտյալ Վահե Ղուկասյանի վճռաբեկ բողոքը բավարարվել է մասնակի, բեկանվել եւ փոփոխվել է քրեակատարողական հիմնարկի պետի 16.11.2018 թվականի որոշման դեմ Վահե Ղուկասյանի բողոքը մերժելու վերաբերյալ Շիրակի մարզի առաջին ատյանի ընդհանուր իրավասության դատարանի, ՀՀ վերաքննիչ քրեական դատարանի որոշումները, եւ ՀՀ վճռաբեկ դատարանի որոշմամբ Վահե Ղուկասյանի բողոքը մերժվել է այն քրեական գործեր քննող առաջին ատյանի ընդհանուր իրավասության դատարանին ընդդատյա չլինելու պատճառաբանությամբ, իսկ հայցվոր Վահե Ղուկասյանի անունից վերջինիս ներկայացուցիչ Մամիկոն Մուրադյանը հայցադիմումը դատարան է (Գյումրիի նստավայր) ներկայացրել 18.01.2022 թվականին, այսինքն՝ Վճռաբեկ դատարանի որոշումից հետո երկամսյա ժամկետում: Գրավոր ընթացակարգով գործը կքննվի հունիսի 27-ին: Նշեմ, որ սա առաջին գործը չէր, կապված համաներման հետ: Մինչեւ վերջերս դատարանում էր այդ «համատարած» բողոքներից մեկի՝ «Հրազդան» ՔԿՀ դատապարտյալ Տիգրան Չավուշյանն ընդդեմ արդարադատության նախարարության «Հրազդան» քրեակատարողական հիմնարկի՝ Ազգային ժողովի «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» 03.10.2013 թվականի որոշումը կիրառելուն եւ վերջինիս չկրած պատժաչափը վեց ամսով կրճատելուն եւ պատիժն ամբողջությամբ կրած լինելու հիմքով ազատ արձակելուն պարտավորեցնելու պահանջի մասին:
Ռուզան ՄԻՆԱՍՅԱՆ
Կարդացեք նաև
«Առավոտ» օրաթերթ
04.06.2022
